Lideri populist i Serbisë ka thënë të martën se vendimi i qeverisë për ta ndaluar tubimin e muajit të ardhshëm të LGBT-së do të zbatohet pavarësisht kritikave të ndërkombëtarëve dhe zotimit të organizatorëve se ata do të mblidhen gjithsesi, shkroi AP.
Presidenti Aleksandar Vuçiq dhe qeveria serbe kanë përmendur krizat me Kosovën dhe problemet ekonomike të vendit në mes të luftës në Ukrainë si arsye për mosmbajtjen e ngjarjeve të datave 12-18 shtator.
Vendimi i lajmëruar të shtunën është pritur me kritika nga partitë opozitare në Serbi dhe nga aktivistët e të drejtave në botë, që kanë kritikuar autoritetet për mosmbrojtje të të drejtave demokratike dhe nënshtrimit të presionit nga grupet ekstremiste që kundërshtojnë marshimin e paradës së krenarisë.
“Nëse një tubim është i ndaluar, atëherë do të ndalohet”, tha Vuçiq. “Nuk ka lojëra me vendimet e shtetit”.
Organizatorët e EuroPride – që përfshin një javë ngjarjesh dhe një paradë në Beograd – kanë thënë se do ta presin vendimin zyrtar dhe më pas ta apelojnë në gjykatat e Serbisë.
“Nëse ata vazhdojnë me ndalimin, ne do të mblidhemi prapë se prapë dhe do të ecim bashkë me miqtë tanë nga jashtë”, tha Goran Miletiq, drejtor i Mbrojtësit e të Drejtave Civile.
© KOHA.
