Botë

Dorëheqja e Johnsonit pikëlloi Ukrainën

Vendimi i Boris Johnsonit për t'u dorëhequr nga posti i kryeministrit të Britanisë së Madhe në Ukrainë u prit me dëshpërim. Largimi i Johnsonit, sipas presidentit ukrainas, Volodymyr Zelensky, është lajm i trishtë për tërë "shoqërinë ukrainase", shkruan CNN-i të dielën.

Johnson ishte ndër mbështetësit më të zëshëm për Kievin, prej kur Rusia nisi pushtimin ukrainas më 24 shkurt të këtij viti. Në fillim të prillit, Johnson u bë një nga udhëheqësit e parë të huaj që bëri udhëtim të pasigurt në kryeqytetin ukrainas, për ta bërë të njëjtën gjë një muaj më pas. Në analizën e CNN-it, thuhet se ish-kryeministri britanik krijoi marrëdhënie të ngushta me presidentin Zelensky.

“Ne e dëgjuam këtë lajm me trishtim. Jo vetëm unë, por edhe e gjithë shoqëria ukrainase”, i tha Zelensky ish-kryeministrit Johnson në një telefonatë të enjten.

Zelensky shtoi se nuk ka dyshim që mbështetja e Britanisë së Madhe do të ruhet ndaj Ukrainës “por lidershipi dhe karizma juaj personale e bënë atë të veçantë”.

Kristine Berzina, bashkëpunëtore e lartë e politikës së sigurisë dhe mbrojtjes në fondin gjerman ‘Marshall’ të SHBA-së, deklaroi se pos mbështetjes ushtarake të Mbretërisë së Bashkuar, personaliteti i Johnsonit ka luajtur një rol të madh në mënyrën se si e shohin atë ukrainasit.

“Zëri dhe guximi i mbështetjes së Johnson për luftën e Ukrainës qëndron në kontrast të plotë me mbështetjen e nënvlerësuar të dhënë nga kancelari gjerman Olaf Scholz. Këtu ishte një udhëheqës i një fuqie të madhe evropiane, një fuqie bërthamore, që nuk kishte frikë të mbështeste Ukrainën”, deklaroi ajo.

Të enjten (7 korrik), Boris Johnson ka dhënë dorëheqje nga pozita e kryeministrit të Britanisë së Madhe, pak para se t’i mbushte tre vjet në krye të vendit.