Bombardimet në qytetin lindor të Ukrainës, Lysychansk, janë shtuar të mërkurën, deklaroi guvernatori rajonal, Serhiy Haidai, duke shtuar se armë të kalibrave të mëdhenj rus po e granatojnë atë.
Siç raporton “The Guardian”, të mërkurën, luftimet po vijojnë në periferi të qytetit, ndërsa mijëra civilë kanë mbetur të bllokuar.
“Luftimet janë në kulm. Frekuenca e bombardimeve është e madhe. Nga 100 mijë banorë sa kishte qyteti, tani kanë mbetur vetëm 15 mijë. Evakuimi i tyre mund të jetë i rrezikshëm aktualisht”, deklaroi Haidai.
Sipas tij, forcat ruse u afruan pranë qytetit me numër të madh automjetesh e ushtarësh. Trupat ruse, që me ngulm po përpiqen ta shtien në dorë Lysychanskun, ditë më parë e pushtuan qytetin fqinj Siervierdonetsk, pas disa javësh luftime e dhjetëra civilësh të vrarë.
Lysychansku është qyteti i fundit i madh në rajonin e Luhanskut, që rusët po e bombardojnë në mënyrë masive.
Të mërkurën u shënua dita e 126-të, qëkur nisi pushtimi rus në Ukrainë.
