Qëkur nisi pushtimi rus në Ukrainë, për dallim nga shtetet e tjera të Bashkimit Evropian, Greqia, Qipro dhe Malta e kanë dyfishuar sasinë e naftës së importuar nga Rusia.
Siç shkruan “The Independent” të martën, kompanitë e transportit dhe anije e lidhura me tri vendet, i importuan 58 milionë fuçi naftë ruse gjatë majit, krahas me muajin shkurt, që nga Rusia i morën 31 milionë fuçi naftë.
Tri vendet i posedojnë flotat më të mëdha të transportit detar në Bashkimin Evropian.
Rritja e transportit të naftës së papërpunuar ruse erdhi si pasojë e trefishimit të tarifave të transportit të mallrave, që nga nisja e luftimeve në Ukrainë.
Vazhdimi i importit nga Greqia, Qipro e Malta, po konsiderohet si minim i afekteve të sanksioneve perëndimore ndaj Rusisë.
“Anijet e lidhura me Greqinë, Qipron dhe Maltën, po tallen me përpjekjet e BE-së për të sanksionuar makinerinë e luftës së Putinit, duke mbajtur fluksin e parave në Rusi, ndërsa forcat e armatosura të vendit vazhdojnë të godasin Ukrainën”, deklaroi Louis Goddard, këshilltar i ‘Global Witness’ për hetimin e të dhënave.
Shtetet kryesore të BE-së kanë marrë nisma për të ulur varësinë e naftës ruse dhe tashmë e kanë zvogëluar importin nga ky vend.
Me të nisur pushtimi, shtetet perëndimore, përfshirë ato të Bashkimit Evropian, i vunë sanksione ekonomike dhe politike Rusisë, me qëllim të dobësimit të saj. Të martën u shënua dita e 104-t e pushtimit rus.
© KOHA. Të gjitha të drejtat janë të rezervuara.
