Bartja e maskës nuk do të jetë më obligative gjatë fluturimeve dhe në aeroportet e vendeve të Bashkimit Evropian, duke filluar nga e hëna e ardhshme, bazuar në një udhëzues të ri të publikuar të mërkurën, raportoi BBC-ja.
Masa e re është në linjë me ndryshimin e rregullave sa i përket pandemisë me COVID-19 në transportin publik nëpër Evropë, ka bërë të ditur Agjencia e Sigurisë së Aviacionit e BE-së (EASA).
Të njëjtin veprim e kanë ndërmarrë edhe disa kompani amerikane të aviacionit në prill, pasi një vendim gjykate e hodhi poshtë vendimin e qeverisë për mbajtje të maskës.
“Nga java e ardhshme, bartja e maskës nuk do të jetë më e detyrueshme në udhëtimet ajrore në të gjitha rastet, duke u përshtatur gjerësisht me kërkesat në ndryshim të autoriteteve kombëtare në të gjithë Evropën për transportin publik. Është një lehtësim për të gjithë ne që më në fund po arrijmë në një fazë të pandemisë ku mund të fillojmë të relaksojmë masat e sigurisë shëndetësore”, ka thënë drejtori ekzekutiv i EASA, Patrick Ky.
© KOHA. Të gjitha të drejtat janë të rezervuara.
