Kremlini: Zgjerimi i mëtejshëm i NATO-s s’do të sjellë stabilitet në Evropë
Foto: Zëdhënësi i Kremlinit, Dmitry Peskov
Derisa Finlanda dhe Suedia po konsiderojnë anëtarësimin në NATO këtë verë, Rusia ka thënë se zgjerimi i aleancës ushtarake nuk do të sjellë stabilitet në Evropë.
"Kemi thënë vazhdimisht se vetë aleanca është më shumë një mjet për konfrontim. Kjo nuk është një aleancë që siguron paqe dhe stabilitet dhe zgjerimi i mëtejshëm i saj, nuk do të sjellë më shumë stabilitet në kontinentin evropian", ka thënë të hënën zëdhënësi i Kremlinit, Dmitry Peskov, raportoi CNN-i.
Finlanda dhe Suedia pritet që shumë shpejt t’i bashkohen Organizatës së Traktatit të Atlantikut të Veriut.
Zyrtarët e NATO-s kanë thënë se diskutimet rreth anëtarësimit të Suedisë dhe Finlandës në aleancë janë bërë shumë më serioze që nga pushtimi rus i Ukrainës.
Kjo çështje u diskutua në takimin ministror të NATO-s që është mbajtur javën që shkoi, ku pjesëmarrës ishin edhe ministrat e Jashtëm nga Stokholmi dhe Helsinki zyrtar.
