Analizë e AP-së: Paqja në Evropë rrezikohet nga Rusia e Putinit

Por gjendja nuk mund të kthehet si më parë as për Rusinë, Evropën e natyrisht as për Ukrainën. Kjo u pa qartë në imazhet nga Bucha. Në periferitë veriore të Kievit, shumë civilë janë qëlluar për vdekje nga trupat ruse. Varreza masive janë gjetur dhe këto janë dëshmi e krimeve të luftës. Janë akte barbare të para në luftërat në Ballkan, akte të cilat nuk duhej të ndodhnin në Evropë përsëri. Ushtarët rusë po i bëjnë këto krime para syve tanë dhe pa dyshim se regjimi rus tenton t’i mohojë këto.

Putini ndihet i kërcënuar nga Ukraina

Lufta e Putinit në Ukrainë është luftë e asgjësimit ndaj Ukrainës. E mohon Ukrainën si shtet, si komb dhe si identitet. Sipas Putinit, Ukraina nuk duhet lejuar të ekzistojë si shtet, sepse ekzistenca e saj kërcënon ekzistencën e Rusisë. Krimet në Bucha janë dëshmi e qëllimit të vërtetë të uzurpimit rus. Ushtarët e Putinit nuk po luftojnë vetëm për ta pushtuar Ukrainën, por vazhdimisht po vrasin popullin civil me artileri të rëndë.

Këto krime janë shumë të pranishme në periferitë veriore të Kievit. Një raport i “Human Rights Watch” liston krimet brutale të luftës ruse në Ukrainë, në mesin e tyre, dhunë seksuale, duke përfshirë dhunimin e grave nga ushtarët rusë. Pastaj, ushtarët rusë shkojnë nëpër shtëpi të ukrainasve dhe grabisin gjërat e tyre. Ky raport tutje vuri në pah se ushtarët e Putinit ishin dërguar në luftë pa paralajmërim dhe jo mirë të përgatitur.

Mirëpo, këta shpejt adaptohen në fushën e luftës dhe mund të thuash se ushtria e Putinit është një grup hajdutësh, përdhunuesish dhe vrasësish të pajisur me artileri të rëndë.

Lufta në Ukrainë ka sjellë vdekje dhe shkatërrim

Duhet të jetë e qartë për të gjithë se ajo çfarë ndodhi në Bucha ka ndodhur dhe do të ndodhë edhe në vende tjera, si në Chernihiv, Izyum, Mariupol dhe në Donbas. Putini u referohet këtyre ngjarjeve si “operacioni special”, por në fakt është një kampanjë e tij që sjell vetëm vdekje dhe shkatërrim në një vend paqësor siç ishte Ukraina.
Nuk do të ketë rikthim në status quo as për Rusinë e as për Evropën.

Kjo luftë ka ndryshuar rrënjësisht ca gjëra në kontinent, gjithashtu ka bërë të qartë se paqja në Evropë mund të ekzistojë vetëm nëse mbrohemi nga Rusia. Fakti se Rusia është një vend destruktiv gjeopolitik, nuk është diçka e re. Kjo ka qenë e ditur që nga viti 2014.

Ngjarjet si aneksimi i Krimesë, mbyllja e fluturimeve të linjës ajrore të Malajzisë MH17 dhe lufta në Donbas e filluar nga Putini do të duhej ta kishin bërë të qartë se nuk bëhet biznes me një shtet si ky. Por udhëheqësit politikanë në Evropë dhe Gjermani u munduan t’i bënin të dyja: në njërën anë, dënuan Putinin me sanksione, por në të njëjtën kohë, vazhduan marrëdhëniet biznesore me të. Për shembull, Qeveria e Gjermanisë vazhdoi bashkëpunimin me gazsjellësin “Nord Stream 2” dhe më pas lejoi që gazin e maganizuar t'ia shiste “Gazpromit” e që është mjaft shqetësuese.

Heshtja gjermane

Në Gjermani po shfaqet përsëri një lloj cinizmi rreth situatës në Ukrainë: fillimisht tronditen, pastaj veprojnë me mendjeprehtësi. Edhe një herë si në vitin 2014, Gjermania nuk po u kushton rëndësi qëllimeve të Rusisë.

Madje disa e shohin si të panevojshme ta kundërshtosh Putinin. Në disa grupe politike gjermane ekziston edhe qëndrimi i tillë si: “Kujt dreqin i intereson Ukraina”.
Shtetet që shtrihen mes Berlinit dhe Shën Petersburgut nuk shihen si shtete krejtësisht të pavarura. Çfarëdo dëshire apo propozimi që paraqesin këto shtete vazhdimisht injorohen. Shumë djathtistë gjermanë janë kundër imperializmit amerikan, por shfaqja e imperializmit rus nuk është se iu bën përshtypje.

Në sytë e atyre që nuk i kushtojnë rëndësi luftës së Putinit, vetëm ata që vazhdojnë të bëjnë biznes me Rusinë janë racionalë dhe ata që banalizojnë monstruozitetin e krimeve të luftës duke përmendur se SHBA-ja gjithashtu ka po këtë qasje ndaj luftës në Ukrainë. Është e çuditshme se nga po vjen kjo prirje që t'i injorojmë gjërat që po ndodhin para syve tanë.

Të ofenduar nga ambasadori ukrainas

A nuk është i çuditshëm fakti se politikanët gjermanë indinjohen nga ambasadori ukrainas kur flet për rrezikun që gjendet në shtetin e tij dhe nuk u kushtojnë vëmendje dezinformatave të Ambasadës ruse në Gjermani. Pastaj, dukuri e çuditshme janë veturat ruse të para së fundmi në Berlin.

Fjalët si “morali” dhe “vlerat” janë shndërruar në fjalë të ndyra për disa. Ndërsa marrëveshja e bërë më 1945 se njerëzit do të jetojnë në paqe dhe në liri tani është vënë në pikëpyetje.

Çështja e Ukrainës është shumë më shumë dhe determinon se a po e tolerojmë agresionin e luftës në Evropë apo jo. A po e lejojmë tmerrin e vrasjeve dhe përdhunimeve të kthehen në Evropë. Kjo gjë po na kërcënon drejtpërdrejt.

Nëse Putini po bën këto gjëra në Ukrainë, ai mund t’i bëjë këto edhe në shtetet baltike, Moldavi dhe Poloni e më pas lufta do të zgjerohet. Ne duhet ta ndalojmë luftën kriminale të Putinit, sepse përbën kërcënim në jetën tonë dhe në gjithë Evropën. Para se të shpërthente lufta në Ukrainë, Putini deklaroi se do të udhëhiqte edhe shtetet e tjera të Evropës Lindore. Ai dëshiron ta shkatërrojë Evropën paqësore dhe ne duhet të mbrohemi nga ai. Kjo është në interesin tonë jetësor.

Evropa duhet të jetë e gatshme ta mbrojë veten ushtarakisht nga Rusia

Ne evropianët duhet të jemi të gatshëm ta mbrojmë veten kundër këtij agresioni. Kjo është edhe arsyeja pse forcat federale të Gjermanisë janë reformuar e ekipuar në atë pikë sa mund të funksionojnë si ushtri. Është domethënëse se riarmatimit po i kushtohet rëndësi dhe në këtë mënyrë mbrohemi nga kjo Rusi agresive.

Mënyra e vetme për t’iu kundërpërgjigjur krimeve në Bucha dhe në vende tjera është nëse e furnizojmë Ukrainën me armë. Duhet ta mbështesim atë, ngase ajo nuk po e mbron vetëm veten, por gjithë Evropën dhe po paguan shtrenjtë për këtë.

Nëse trupat e Putinit dështojnë në Ukrainë, gjithashtu me të do të shkojë dhe imperializmi i Putinit. Nuk duhet lejuar që Rusia të fitojë. Nësë Putini humb, do të dobësohet, por nëse fiton, ai vetëm do të përforcohet edhe më shumë.

A po mundohet Rusia ta ndihmojë disi Rusinë?

Është e tmerrshme përshtypja se Gjermania nuk po e ndihmon me të vërtetë Ukrainën. Është e vërtetë se ajo po e furnizon atë me shumë armë, megjithatë nuk po bën gjithçka që ajo mund të bëjë. Berlini po e mban këtë qëndrim duke menduar se ka shpresë për t’u kthyer në gjendjen status quo. Në anën tjetër, ka më shumë raporte rreth atyre se çfarë mjetesh ushtarake Gjermania refuzon t’i dërgojë Ukrainës sesa rreth asaj se çfarë dëshiron t’i dhurojë.

Gjermania mendohet se është shteti evropian që më së paku po aplikon sanksionet në Rusi. Kjo është e pakuptueshme dhe dëmton imazhin e Gjermanisë në Evropën Lindore dhe për më tepër është veprim i gabuar politik. Me këtë Putin nuk mund t’iu kthehemi gjërave si kanë qenë dhe ishte gabim vazhdimi i importimit të vajit dhe gazit nga Rusia pas vitit 2014 e lëre më tani.

Nëse Gjermania heq dorë nga vaji i Rusisë dhe nëse bojkoton gazin rus, do të ketë pasojë ekonomike, por duhet të mendojmë se çfarë është më e rëndësishme këtu e që është liria.

Krimet e luftës në Bucha dhe në vende të tjera duhet të na përkujtojnë se kjo luftë është e tmerrshme, është afër nesh dhe ndikon në ne. Është në interesin tonë ta ndalim Putinin. Duhet të bëjmë gjithçka që mundemi për ta ndalur këtë luftë dhe të mos lejojmë shpërndarjen e saj. Për atë arsye duhet ta ndihmojmë Ukrainën urgjentisht.

Përktheu: Leutrime Rekaliu

© KOHA. Të gjitha të drejtat janë të rezervuara.