India ka dërguar mijëra tonë grurë në Afganistan për të lehtësuar krizën ushqimore.

Ndihma është nisur drejt Afganistanit pasi India arriti një marrëveshje me Pakistanin për dërgimin e pakove me grurë. Më shumë se 50 kamionë me 2 mijë e 500 tonë grurë të dhuruar nga India kanë kaluar kufirin mes Indisë dhe Pakistanit.

Gjatë javës së kaluar, zyrtarët pakistanezë lejuan që India të dërgonte grurin në Afganistanin që po vuan nga kequshqyerja dhe mungesa e madhe e ushqimit. Vendimi për lejimin e grurit nga Pakistani u mor tre muaj pasi India dërgoi pajisje mjekësore për Afganistanin.

Shteti afgan është shembur që kur talebanët morën kontrollin në gushtin e vitit të kaluar. Në muajt e fundit me ushqim dhe ilaçe ka ndihmuar edhe Pakistani. India dhe Pakistani kanë histori të mosmarrëveshjeve në lidhje me Kashmirin, por kanë lënë anash ndasitë për t’i ndihmuar Afganistanit në krizë të thellë ekonomike.

Organizatat e Kombeve të Bashkuara kanë paralajmëruar se miliona njerëz vuajnë nga uria, ndërkaq shumë të tjerë janë në uri ekstreme.