Komiteti portugez nxjerr në dritë mbi 200 raste të abuzimit seksual në kisha
Foto: Ilustrim
Një komitet në Portugali që merret me historinë e abuzimit seksual të fëmijëve në Kishën Katolike portugeze, ka thënë se gjatë muajit të parë të punës së tyre ka pranuar akuza nga 214 persona, raporton Associated Press.
Akuzat vijnë nga njerëz të lindur mes viteve 1933 deri më 2006 dhe treguan për torturën psikologjike të mbajtur sekret për dekada, ka thënë Komiteti i pavarur për Studimin e Abuzimit të Fëmijëve në Kishë.
“Kjo vuajtje lidhet me ndjenjën e turpit, frikës, fajësisë dhe vetëpërjashtimit, duke forcuar idenë e jetës ku ndjenja e të qëndruarit anash ishte gjithnjë prezentë”, ka thënë komiteti.
Zyrtarët e Kishës portugeze kanë thënë dy vjet më parë se autoritetet kanë hetuar vetëm disa pretendime që ishin bërë për abuzim seksual, përfshirë priftërinjtë portugezë që nga viti 2001. Shumica e atyre rasteve u fshinë me arsyetimin se nuk kishte shumë prova.
