Këngëtarja çeke Hana Horka, vdiq pasi u infektua qëllimisht me COVID-19, ka treguar biri i saj për BBC-në.
57-vjeçarja nuk ishte e vaksinuar dhe kishte postuar në rrjete sociale se po rikuperohet pas testimit pozitiv, por vdiq dy ditë pasi postoi.
I biri i saj, Jan Rek, ka treguar se ajo ishte infektuar qëllimshëm kur ai dhe babai i tij ishin infektuar me virus. E bëri në mënyrë që të rikuperohej e të mund të kishte qasje në ngjarje të ndryshme.
Republika e Çekisë ka raportuar shifër rekord të rasteve me koronavirus të mërkurën.
Rek dhe babai i tij, të dy të vaksinuar plotësisht, ishin infektuar me COVID gjatë Krishtlindjes. Por, Hana vendosi të mos qëndronte larg tyre, duke preferuar që të ekspozohej ndaj virusit.
“Ajo duhej të izolohej për një javë, pasi ne dolëm pozitivë. Por, vendosi të qëndronte me ne gjatë gjithë kohës”, ka thënë Rek.
Në Çeki për të marrë pjesë në ngjarje sociale e kulturore, kërkohet dëshmi e vaksinimit apo se je shëruar së fundi nga virusi.
Hana Horka ishte anëtare e një prej grupeve më të vjetra të muzikës folklorike çeke, Asonance. Ajo donte të infektohej me COVID në mënyrë që të mos ketë kufizime. Por, ajo edhe ishte refuzuese e vaksinimit.
Horka vdiq të dielën.
Rek ka fajësuar teoritë e ndryshme të konspiracionit për vdekjen e nënës së tij.
“Për dhjetë minuta mbaroi çdo gjë. Ajo mbeti pa frymë. Filozofia e saj ishte se më mirë është të infektohesh me COVID sesa të vaksinohesh”, tha Rek.
Rek ka thënë se storia e nënës së tij të shërbejë si shembull për të bindur personat të vaksinohen.
Të mërkurën në Çeki janë regjistruar 28.469 raste të reja me koronavirus.
© KOHA. Të gjitha të drejtat janë të rezervuara.
