Një panel i Gjykatës federale të apelit lejoi të premten që urdhri i presidentit Joe Biden, për vaksinën COVID-19 për punëdhënësit më të mëdhenj privatë të ecë përpara, duke kthyer kështu mbrapshtë një vendim të mëparshëm, për një kërkesë që mund të prekë rreth 84 milionë punëtorë amerikanë.
Vendimi 2-1 nga një panel i Gjykatës së 6-të të Apelit të Rrethit të SHBA-së në Cincinnati anulon një vendim të një gjyqtari federal në një gjykatë të veçantë që kishte pezulluar urdhrin në mbarë vendin.
Urdhri nga Administrata e Sigurisë dhe Shëndetit në Punë të SHBA-së do të hynte në fuqi më 4 janar. Me vendimin e së premtes, nuk është e qartë se kur mund të vendoset kërkesa, por Shtëpia e Bardhë tha në një deklaratë se do të mbronte punëtorët.
“Veçanërisht ndërsa SHBA-ja përballet me variantin shumë të transmetueshëm Omicron, është thelbësore që të ecim përpara me kërkesat e vaksinimit dhe mbrojtjen për punëtorët me urgjencën e nevojshme në këtë moment”, thuhet në deklaratën e Shtëpisë së Bardhë.
Prokurorët e përgjithshëm republikanë të shtetit dhe grupet konservatore thanë se do të apelonin vendimin e së premtes në Gjykatën e Lartë të SHBA.
Njëzet e shtatë shtete të udhëhequra nga republikanët u bashkuan me grupet konservatore, shoqatat e biznesit dhe disa biznese individuale për të kundërshtuar kërkesën sapo OSHA-ja publikoi rregullat në fillim të nëntorit. Ata argumentuan se agjencia nuk ishte e autorizuar të bënte rregullin e urgjencës, pjesërisht sepse koronavirusi është një rrezik i përgjithshëm për shëndetin dhe nuk përballet vetëm nga punonjësit në punë.
Kërkesa e vaksinës do të zbatohej për kompanitë me 100 ose më shumë punonjës dhe do të mbulonte rreth 84 milionë punëtorë në SHBA. Punonjësit që nuk janë vaksinuar plotësisht do të duhet të mbajnë maska për fytyrën dhe t'i nënshtrohen testeve javore të COVID-19. Do të kishte përjashtime, përfshirë ata që punojnë jashtë ose vetëm në shtëpi.
Administrata ka vlerësuar se rregulli do të shpëtonte 6,500 jetë dhe do të parandalonte 250,000 shtrime në spital gjatë gjashtë muajve.
© KOHA. Të gjitha të drejtat janë të rezervuara.
