Botë

Çavushoglu takon përfaqësuesit talebanë në Ankara

Ministri i Jashtëm turk është takuar të enjten me një delegacion të zyrtarëve të lartë talebanë, në kuadër të bisedimeve të para të tilla qëkur talebanët e morën kontrollin mbi Afganistanin në gusht, pas tërheqjes së Shteteve të Bashkuara të Amerikës.

Takimi në Ankara midis ministrit Mevlut Çavushoglu dhe ministrit të Jashtëm afgan të caktuar nga talebanët, Amir Kan Mutaqi, është mbajtur pasi që liderët talebanë zhvilluan bisedime me përfaqësues të Shteteve të Bashkuara të Amerikës, dhjetë vendeve evropiane dhe Bashkimit Evropian në Katar, gjatë kësaj jave.

Duke folur pas takimit, Çavushoglu ka theksuar se temë diskutimi kanë qenë fluturimet nga aeroporti i Kabulit.

Kjo temë, sipas tij, është ngritur pasi që talebanët e kërkuan ndihmën e Ankarasë në këtë drejtim.

Ai ka thënë gjithashtu se Turqia ka sugjeruar krijimin e një qeverie më gjithëpërfshirëse afgane, si dhe arsimimin e vajzave nën qeverisjen talebane.