Në Britaninë e Madhe ka 1,9 milionë duhanpirës më pak se sa para një dekade, kur në këtë vend ishte vendosur ndalesa e pirjes së duhanit, tregon një hulumtim i organizatës britanike Cancer Research UK.

Dhjetë vjet pas miratimit të ligjit për ndalimin e pirjes së duhanit, përqindja e duhanpirësve në Britani të Madhe është në nivelin më të ulët të regjistruar duke rënë në pothuajse 20 për qind, nga 10,2 milionë në vitin 2007 në 8,3 milionë në vitin 2016, shkruan “Independent”, transmeton KosovaPress.

Përqindja e duhanpirësve në mesin e të rinjve nga 16 deri 24 vjeç ka rënë gjatë periudhës dhjetëvjeçare nga 26 në 17 për qind, që është nivel i ulët rekord dhe rënia më e madhe e vlerësuar në të gjitha kategoritë e moshave.

Pirja e duhanit në vitin 2007 ishte ndaluar pothuajse në të gjitha vendet publike, përfshirë zyrat, fabrikat, restorantet dhe stacionet hekurudhore.