3 perditesime
22:00

Tërmeti i fuqishëm prej 7.2 ballësh lë së paku 227 të vdekur në Haiti

(AP) – Një tërmet i fuqishëm ka lënë të vdekur të shtunën së paku 227 persona në jugperëndim të Haitit, duke i shndërruar kishat, hotelet dhe shtëpitë në gërmadha gjatë tragjedisë më të fundit që ka goditur shtetin e varfër të Karaibeve veçse të përballur me krizë humanitare dhe politike.

Tërmeti prej 7.2 ballësh të Rihterit, i cili u pasua nga një seri dridhjesh të njëpasnjëshme, epiqendër kishte qytetin Petit Trou de Nippes, rreth 150 kilometra larg kryeqytetit Port-au-Prince. Dridhjet që janë ndier edhe në Kubë dhe Xhamajkë janë potencialisht më të forta sesa magnituda prej 7 ballësh e tërmetit të 11 vjetëve më parë që kishte lënë të vdekur me dhjetëra mijëra qytetarë në vendin më të varfër të Karaibeve.

Në kryeqytet, dridhjet janë ndier më së shumti, por nuk kanë shkaktuar dëme të mëdha, kanë bërë të ditur autoritetet.

Kryeministri Ariel Henry, ka shpallur gjendje njëmujore të emergjencës shkaku i situatës.

Në Les Cayes, banorët lokalë kanë raportuar se ujërat kanë vërshuar shkurtimisht qytetin bregdetar, duke shkaktuar panik mes frikës për cunami. Sistemi amerikan për Paralajmërimin e Cunameve ka lëshuar paralajmërimin për cunami pas tërmetit, porse më vonë e ka tërhequr.

Presidenti amerikan, Joe Biden, ka autorizuar përgjigjen emergjente të SHBA-së për tërmetin dhe ka emëruar Samantha Powerin, administratoren e Agjencisë amerikane për Zhvillim Ndërkombëtar, për koordinimin e operacioneve.

Tërmeti i së shtunës ka ndodhur rreth një muaj pas vrasjes së presidentit Jovenel Moise, i cili po qeveriste me dekret, në ngjarjen që nxiti trazira politike në vend.

Ndërkaq, pjesë të shumta të Haitit po përballen me uri përherë më të rëndë ndërsa shërbimet shëndetësore janë të stërngarkuara me pacientë të prekur nga sëmundja COVID-19.

Vendi porsa është rimëkëmbur nga goditja e uraganit Matthew më 2016, nga i cili të vdekur kishin mbetur me qindra persona ndërsa dëmet materiale ishin enorme.

Haiti është goditur më herët disa herë nga tërmetet e fuqishme dhe uraganet.

Dridhjet prej 5.9 ballësh të Rihterit gjatë vitit 2018 kishin shkaktuar me dhjetëra të vdekur, ndërsa nga tërmeti i fuqishëm prej 7.1 ballësh më 2010 llogaritet se jetën kanë humbur rreth 300 mijë persona.

20:56

Së paku 29 të vdekur nga dridhjet e forta të tokës në Haiti

Së paku 29 persona kanë mbetur të vdekur të shtunën, kur një tërmet prej 7.2 ballësh dridhi Haitin, duke i shndërruar në rrënoja kishat, hotelet dhe shtëpitë në tragjedinë më të fundit në vendin e varfër të Karaibeve.

Tërmeti me epiqendër rreth 125 kilometra në perëndim të kryeqytetit Port-au-Prince, është shoqëruar me dridhje të tjera të njëpasnjëshme.

Në disa video të publikuara nëpër mediat sociale janë shfaqur pamjet e ndërtesave të shkatërruara afër epiqendrës dhe të njerëzve tek vrapojnë nëpër rrugë.

Autoritetet e mbrojtjes civile kanë raportuar se kanë angazhuar menjëherë ekipe për nisjen e misionit të kërkimit dhe shpëtimit.

Haiti është goditur më herët disa herë nga tërmetet e fuqishme dhe uraganet.

Dridhjet prej 5.9 ballësh të vitit 2018 kishin shkaktuar me dhjetëra të vdekur, ndërsa nga tërmeti i fuqishëm prej 7.1 ballësh më 2010 llogaritet se jetën kanë humbur rreth 300 mijë persona.

19:28

Disa të vdekur nga tërmeti në Haiti, dëmet enorme

Tërmeti me magnitudë prej 7.1 shkallësh në Haiti ka lënë disa persona të vdekur dhe dhjetëra të lënduar, raporton BBC. Epiqendra e tërmetit shkatërrues që ndodhi të premten ishte rreth 12 kilometra nga qyteti Saint-Louis du Sud.

Autoritetet kanë njoftuar se dëmet janë enorme.

"Shumë shtëpi janë shkatërruar, ka njerëz të vdekur dhe disa janë në spital", thuhet nga Qeveria.

Kryeministri Ariel Henry ka njoftuar se kanë mobilizuar një ekip që do të trajtojë ngjarjen e rëndë që ndodhi mëngjesin e së shtunës.

Haiti është ende duke u rikuperuar nga tërmeti shkatërrues i 2010-s, ku kishte mbytur më shumë se 200 mijë njerëz.

 

 

Foto: Associated Press/AP

15:11

Një tërmet me 7.0 shkallë godet Gadishullin e Alaskës

Një tërmet me magnitudë prej 7.0 shkallësh ka goditur Gadishullin e Alaskën. Independent raporton se Sistemi i Paralajmërimit të Cunamit nuk ka lëshuar asnjë alarm për cunami pas dridhjes, derisa tërmeti goditi në një thellësi prej 10 kilometra.

Nuk raportohet për të lënduar.

Ndërkohë, një tërmet ka goditur edhe Haitin. Mediumet ndërkombëtare raportojnë se shkalla e rihterit ishte 7.2.

Në pamjet që janë publikuar në mediat ndërkombëtare shihet se si tërmeti shkaktoi dëme materiale dhe i detyroi qytetarët t'i lëshojnë shtëpitë e tyre.