E fejuara e gazetarit disident saudit Jamal Khashoggi ka akuzuar autoritetet amerikane për fshehjen e fakteve mbi vrasjen e tij dhe ka thënë se dështimi i tyre në transparencë mund të lejojë vrasje të tjera të ngjashme.
Hatice Cengiz, një shkrimtare dhe aktiviste turke, tha se nëse qeveria amerikane nuk zbulon atë që di, do të "tregojë se vlerat e SHBA-së dhe të gjitha vendeve të mira janë boshe dhe të pavlera".
"Qeveria amerikane duhet të japë të gjitha informacionet që ka në lidhje me vrasjen e Jamal, në mënyrë që e vërteta të dalë në shesh. Nuk ka asnjë arsye për të fshehur faktet", tha ajo për The Independent.
Në fillim të këtij viti, një raport i inteligjencës amerikane tha se besohej se princi i kurorës i Arabisë Saudite Mohammed Bin Salman, i njohur zakonisht si MBS, kishte urdhëruar vrasjen e tetorit 2018, pasi u nervozua nga kritikat e Khashoggit për mbretërinë.
Khashoggi u vra ndërsa po vizitonte konsullatën saudite në Stamboll, Turqi, në tetor 2018 dhe trupi i tij u copëtua.
Gazetari 59-vjeçar kishte qenë dikur këshilltar i qeverisë saudite dhe i afërt me familjen mbretërore, por në vitin 2017 shkoi në SHBA.
Nga atje, ai shkroi kolonë mujore në Washington Post në të cilën kritikoi politikat e princit Mohammed.
© KOHA. Të gjitha të drejtat janë të rezervuara.
