Me mijëra palestinezë kanë vërshuar rrugët të premten për ta festuar nisjen e armëpushimit në Gazë, të cilën shumica e tyre e cilësuan si fitore të kushtueshme por të qartë për grupin militant Hamas.
Në anën tjetër, Izraeli është zotuar të kundërpërgjigjet me “nivel të ri të forcës” në rast të armiqësive të mëtutjeshme.
Njëmbëdhjetë ditët e luftimeve midis Izraelit dhe Hamasit kanë lënë mbi 240 të vdekur, kryesisht palestinezë, dhe ka shkaktuar shkatërrime të konsiderueshme në një pjesë e madhe e territorit të Rripit të Gazës.
Kryeministri izraelit, Benjamin Netanyahu është kërcënuar me kundërpërgjigje në rast të sulmeve të reja teksa ka potencuar se vendi i ka shkaktuar dëme të rënda Hamasit. Jetësimin e armëpushimit me ndërmjetësimin e Egjiptit dhe angazhimin diplomatik të presidentit, Joe Biden, e kanë lavdëruar të premten një numër i madh i liderëve botërorë.
Sekretari amerikan i Shtetit, Antony Blinken, ka bërë të ditur se planifikon që gjatë ditëve të ardhshme ta vizitojë rajonin për të diskutuar rreth së ardhmes më të mirë për izraelitët dhe palestinezët.
Ndërkaq shefi i Kombeve të Bashkuara, Antonio Guterres, u kanë bërë thirrje liderëve botërorë që të hartojnë një pako për rindërtim me qëllim të përkrahjes së palestinezëve dhe forcimit të institucioneve të tyre.
Ndërsa sekretari i Jashtëm britanik, Dominic Raab, ka kërkuar që të dyja palët të angazhohen për qëndrueshmërinë e armëpushimit dhe përfundimin e qarkut të papranueshëm të dhunës dhe humbjes së jetëve.
© KOHA. Të gjitha të drejtat janë të rezervuara.
