Izraeli dhe militantët palestinezë kanë ndalur shkëmbimin e zjarrit për disa orë gjatë së enjtes, teksa përpjekjet për arritjen e një armëpushimi kanë marrë shtysë të re, një ditë pasi që presidenti amerikan, Joe Biden, ka bërë thirrje publike për avancim drejt ndaljes së dhunës.
Nuk dihet nëse qetësia tetë-orëshe, më e gjata që nga fillimi i luftimeve 11 ditë më parë, ishte pjesë e një ujdie apo vetëm heshtje e përkohshme e dhunës.
Mirëpo, ajo u prish në orët e pasdites, kur sirenat për sulme ajrore jehuan në Izrael afër kufirit me Gazën, ndërsa ushtria izraelite aktivizoi sulmet. Krejt kjo në ditën kur ministri i Jashtëm gjerman, Heiko Maas, ka vizituar Izraelin në iniciativën për përmbylljen diplomatike të konfliktit. Gjatë qëndrimit në rajon, Maas ka bërë të ditur se Izraeli ka të drejtë që të mbrohet nga sulmet e njëpasnjëshme dhe të papranueshme ndaj tij.
“Për aq kohë sa ka shtete dhe grupe që e kërcënojnë Izraelin me shkatërrim, ai duhet të jetë në gjendje që t’i mbrojë banorët e tij”, ka thënë Maas gjatë takimit me homologun izraelit, Gabi Ashkenazi, të cilin e siguroi për mbështetjen e Gjermanisë.
Vizita e ministrit Maas në Izrael, gjatë së cilës ai u takua me kryeministrin Benjamin Netanyahu dhe ministrat e tjerë, është pjesë e përpjekjes për të përcaktuar se çfarë mund të bëjë komuniteti ndërkombëtar për të arritur armëpushim për krizën.
Qysh nga nisja e konfliktit më të ashpër izraelito-palestinez nga viti 2014, së paku 230 palestinezë kanë mbetur të vdekur, mes të cilëve me dhjetëra fëmijë. Ndërsa, raketat e Hamasit kanë shkaktuar vdekjen e të paktën 12 izraelitëve.
Ndonëse Egjipti, Katari dhe Kombet e Bashkuara kanë ndërmjetësuar bisedimet midis Izraelit dhe Hamasit, dy kundërshtarët kanë deklaruar publikisht se luftimet do të vazhdojnë.
© KOHA. Të gjitha të drejtat janë të rezervuara.
