Vaksina e Pfizerit kundër Covid-19 po u jepet fëmijëve amerikanë nga mosha 12-vjeçare pas aprovimit nga Agjencia amerikane për ushqim dhe ilaçe.
Por, shkencëtarët janë të ndarë nëse kjo është forma më e mirë për t’ia prerë këmbët pandemisë së koronavirusit. Së pari për shkak se shumë vende më të varfra ende po i presin vaksinat e para dhe meqë mjekët më parë kishin thënë se fëmijët kanë më pak rrezik që të infektohen me koronavirus.
Megjithatë, vaksina e Pfizer ka marrë udhë drejt shkollave, pasi rregullatorët amerikanë të ilaçeve kanë dhënë aprovimin. Prindërit, administratorët e shkollave dhe zyrtarët e shëndetit publik kanë pritur në ankth që vaksina t’u jepet sa më shpejt tinejxherëve.
Ka shenja në Shtetet e Bashkuara se Pfizer po shpreson ta shtrijë edhe më shumë përdorimin e vaksinës në mesin e amerikanëve. Shtetet e Bashkuara po vazhdojnë me ritëm të intensifikuar vaksinimin e qytetarëve, me qëllim që të rihapet krejtësisht ekonomia dhe të hiqen të gjitha kufizimet.
© KOHA. Të gjitha të drejtat janë të rezervuara.
