Botë

Përshkallëzim dramatik: Izraeli u kundërpërgjigjet raketave të “Hamasit”

Ministria e Shëndetësisë në Gazë ka bërë të ditur se nëntë palestinezë, përfshirë tre fëmijë, janë vrarë “në serinë e sulmeve në veri të Gazës”. Fjala është për sulmet ajrore të ndërmarra nga Izraeli në kundërpërgjigje ndaj lansimit të raketave në Jerusalem nga “Hamasi”, si ndëshkim për “krimet e Izraelit”. Krejt kjo ka ndodhur në ditën kur më shumë se 300 palestinezë janë lënduar në përleshjet me policinë izraelite jashtë xhamisë “Al-Aqsa”

Tensionet midis Izraelit dhe palestinezëve kanë përshkallëzuar të hënën në mënyrë dramatike, pasi që grupi militant në Gazë – “Hamas” – ka hedhur raketa në drejtim të Jerusalemit, teksa Izraeli është kundërpërgjigjur me sulme ajrore ndaj territorit bregdetar palestinez, si pasojë e përleshjeve para xhamisë “Al-Aqsa”.

“Hamasi” ka lansuar raketat nga Gaza në drejtim të Izraelit, vetëm pak minuta pas skadimit të ultimatumit të saj vënë vendit për tërheqjen e forcave të sigurisë si nga zona e Jerusalemit, ku ndodhet “Al-Aqsa”, ashtu edhe nga lagjja Sheikh Jarrah në Qytetin e Vjetër. Me këtë, grupi ka jetësuar kërcënimin për ta ndëshkuar Izraelin sherri i konfrontimeve të dhunshme me palestinezët dhe i “krimeve”. Banorët e Jerusalemit kanë raportuar të kenë dëgjuar sirenat për sulm ajror pak pas orës 6 sipas kohës lokale, kur dhe ka skaduar ultimatumi i “Hamasit”, si dhe jehonën e tri shpërthimeve më të largëta, ani pse nuk dihet qartë nëse detonimet ishin rezultat i shpërthimit të raketave apo i sistemeve antiraketore të vendosura. Përgjigjja izraelite ka pasuar vetëm pak orë më vonë.

Image

Ministria e Shëndetësisë në Gazë ka bërë të ditur se nëntë palestinezë, përfshirë tre fëmijë, janë vrarë “në serinë e sulmeve në veri të Gazës”. Ajo nuk e ka fajësuar specifikisht Izraelin për vdekjet që kanë ndodhur në një rajon që ka qenë vatër e kahershme e sulmeve me raketa nga militantët.

Krejt kjo ka ndodhur teksa më shumë se 300 palestinezë janë lënduar rëndë në përleshjet me policinë izraelite në xhaminë më të shenjtë të qytetit të Jerusalemit, gjatë shënimit të “Ditës së Jerusalemit”, kur Izraeli ka marrë nën kontroll qytetin gjatë luftës arabo-izraelite të vitit 1967. Shoqëria palestineze e Gjysmëhënës së Kuqe ka njoftuar se palestinezët janë lënduar në përleshjet me policinë izraelite, e cila ka përdorur plumba gome, granata shtanguese dhe gaz lotsjellës në mësymjen drejt xhamisë, e cila nderohet edhe nga hebrenjtë si zonë e tempujve biblikë.

Duke marrë përgjegjësinë për raketat e hedhura, zëdhënësi i krahut ushtarak të “Hamasit”, Abu Obeid, ka thënë se sulmi përbën përgjigje ndaj atyre që ai i quajti “krime dhe agresion” të Izraelit në Qytetin e Shenjtë.

“Ky është një mesazh, të cilin armiku duhet ta kuptojë fare mirë”, ka thënë Obeid. Ndërkaq ka paralajmëruar edhe sulme të tjera po qe se Izraeli e sulmon sërish kompleksin e “Al-Aqsas” apo i zhvendos familjet palestineze në Jerusalemin lindor.

Përshkallëzimi nga “Hamasi” i krizës veçse të rrezikshme ka ndodhur teksa ushtria izraelite ka pezulluar ushtrimin më të madh ushtarak në 30 vjet, me qëllim të rivendosjes së forcave nga frika prej sulmeve raketore nga Gaza. Izraeli ka urdhëruar gjithashtu mbylljen e të gjitha rrugëve afër Gazës, përderisa kryebashkiaku i Ashkelonit ka urdhëruar hapjen e vendstrehimeve publike në rast të bombardimeve.

Tensionet në rritje i pasojnë përleshjet më serioze në qytet që nga viti 2017. Zemërimi është rritur mes palestinezëve për javë me radhë, në prag të vendimit tashmë të shtyrë të një gjykate izraelite nëse autoritetet do të mund t’i nxjerrin me dhjetëra palestinezë nga shtëpitë e tyre në lagjen Sheikh Jarrah dhe shtëpitë e tyre t’ua japin kolonëve hebraikë.

Me qindra palestinezë dhe dhjetëra policë janë lënduar në përleshjet e ditëve të fundit në dhe përreth Qytetit të Vjetër. Konfrontimet gjatë së hënës kanë vazhduar deri në ag, kur policia është vendosur përreth xhamisë.

Nxehja e gjakrave ka ndodhur si rrjedhojë e ndjeshmërisë madhore historike të lokacionit, jo vetëm gjatë muajit të shenjtë mysliman të Ramazanit.