Botë

Kryeministri armen merr përsipër disfatën në Nagorno-Karabah

Kryeministri armen merr përsipër disfatën në Nagorno-Karabah
 

Jerevan, 18 nëntor (Al-Jazeera) – Kryeministri i Armenisë, Nikol Pashinyan, e ka pranuar përgjegjësinë për humbjen e betejës për Nagorno-Karabahun, duke lansuar njëherësh një plan veprimi prej gjashtë muajsh për të siguruar stabilitet demokratik në vend, në kohën kur Qeveria e tij po përballet me presion të madh publik.

Pashinyan i ka hedhur poshtë thirrjet e kundërshtarëve dhe të protestuesve për të dhënë dorëheqje lidhur me atë që konsiderohet vendimi më katastrofal i Qeverisë së tij për të dorëzuar territorin separatist në Azerbajxhan pas gjashtë javësh luftime. Me marrëveshjen e ndërmjetësuar nga Rusia e Vladimir Putinit, Armenia është pajtuar që të tërheqë trupat e veta nga Nagorno-Karabahu, që kontrollohet nga viti 1994 nga trupat armene dhe armenët etnikë. Enklava tashmë do të jetë nën kontroll të azerëve. Bakuja zyrtare kishte humbur gjatë betejave të kaluara me armenët për kontrollin e rajoneve të kontestuara prej prishjes së Bashkimit Sovjetik në vitet nëntëdhjetë.