Raportohet për së paku 20 të vrarë e qindra të plagosur në luftimet mes Azerbajxhanit e Armenisë

Luftimet kanë shpërthyer mes forcave armene dhe atyre të Azerbajxhanit në rajonin separatist Nagorno-Karabakh dhe një zyrtar i lartë i rajonit ka thënë se 16 persona kanë vdekur dhe më tepër se 100 janë plagosur. Po ashtu edhe presidenti i Azerbajxhanit ka njoftuar se ushtria e tij ka pësuar humbje, raporton agjencia AP.

Armenia ka njoftuar se dy helikopterë të Azerbajxhanit janë rrëzuar dhe tre tanke janë goditur nga artileria, por ministri i Mbrojtjes i Azerbajxhanit ka mohuar këtë.

Lufta ka nisur në mëngjes në rajon që gjendet brenda Azerbajxhanit, por ka qenë nën kontroll të forcave etnike armene të mbështetur nga Armenia që nga viti 1994, në fund të luftës separatiste. Nuk është cekur menjëherë se çfarë ka iniciuar luftimin, por është përplasja më e rëndë që nga korriku kur vdiqën 16 persona nga dyja palët.

Autoritetet e Nagorno-Karabakhut kanë raportuar se predhat kanë goditur në kryeqendrën e rajonit Stepanakert dhe në qytetet Martakert dhe Martunio. Ndërsa nga ministria e Mbrojtjes së Armenisë është thënë se një predhë nga Azerbajxhani ka goditur në territorin armen në afërsi të qytetit Vardenis.

Artur Sarkisian, zëvendës-shef i ushtrisë së Nagorno-Karabakhut, ka njoftuar se 16 persona janë vrarë e më tepër se 100 janë lënduar.

Presidenti i Azerbajxhanit, Ilham Aliyev, ka urdhëruar vendosjen e ligjit ushtarak në disa rajone të vendit dhe ka vendosur orë policore në qytetet e mëdha.

Në një adresim televiziv, Aliyev, ka treguar se ka humbje mes ushtarëve të Azerbajxhanit dhe po ashtu popullatës civile si pasojë e bombardimeve armene, por nuk ka dhënë detaje.

Por ai ka thënë se shumë pajisje ushtarake të armikut dhe njësi janë shkatërruar.

Ministri i Jashtëm i Rusisë, Sergey Lavrov, “është në kontakte me të dyja palët për të vendosur armëpushim dhe të fillohen negociatat për stabilizim të situatës”, ka thënë zëdhënësja e ministrisë së Jashtme të Rusisë, Maria Zakharova.

Kryeministri i Shqipërisë, Edi Rama, kryetar i Organizatës për Siguri dhe Bashkëpunim në Evropë, i ka bërë thirrje të dyja palëve që të ndalin luftimet.

Kryeministri i Armenisë, Nikol Pashinian, të dielën ka thënë se vendi i tij do ta rishyqrtojë nëse do ta njoh Nagorno-Karabakhun si të pavarur. Një lëvizje të tillë do të shkaktonte më tepër pengesa në negociata.

Lajmi për luftimet është pranuar rëndë nga Turqia, aleate e ngushtë e Azerbajxhanit. Nga Turqia janë dënuar sulmet armene ndaj Azerbajxhanit dhe është thënë se Turqia do t’i qëndrojë përkrah Azerbajxhanit.

Armenia ka paralajmëruar kundër përfshirjes së Turqisë në konflikt. Nga Ministria e Drejtësisë e Armenisë është thënë se po hetohen raportimet edhe se luftëtarë nga Siria po luftojnë në anën e Azerbajxhanit.

Nga zyra e prokurorit të përgjithshëm në Azerbajxhan të dielën është njoftuar se pesë persona nga një familje kanë humbur jetën nga një predhë e forcave armene, që janë viktimat e para në kryeqendër të Azerbajxhanit, Baku, në këto luftime të sotme.

Shefi i diplomacisë evropiane Josep Borrell u ka bërë sot thirrje Armenisë dhe Azerbajxhanit t’i japin fund konfliktit ushtarak dhe t’i kthehen tavolinës së bisedimeve si zgjidhja e vetme e mundshme.

Borrell ka diskutuar sot me ministrat e këtyre dy vendeve, në të cilin ka theksuar rëndësinë e armëpushimit të menjëhershëm.

“Nuk ka zgjidhje ushtarake për konfliktin, Rruga e vetme për të ecur përpara është që të kthehen në tavolinën e negociatave pa parakushte nën udhëheqjen e Grupit të Minskut OSBE”, ka shkruar ai në Twitter.

Armenia ka vënë në dispozicion ligjin për ushtrinë dhe ka mobilizuar meshkujt të dielën pas përplasjeve me Azerbajxhanin mbi rajonin e diskutueshëm Nagorno-Karabakh, ku tashmë janë raportuar edhe disa viktima.

Armenia ka thënë se Azerbajxhani ka sulmuar me artileri në atë rajon, por këta të fundit kanë deklaruar se i janë përgjigjur sulmeve të armenëve duke mohuar akuzat.

Aktivistët për të drejtat e njeriut në Armeni kanë thënë se dy civilë, një grua dhe një fëmi janë vrarë nga granatat. Baku nuk ka dhënë numër të saktë porse ka konfirmuar se ka të vrarë nga Azerbajxhani dhe gjashtë të lënduar, si dhe nga rajoni i Nagorno-Karabakh 10 nga stafi ushtarak janë vrarë.

Ministri i Jshtëm i Rusisë ka bërë thirrje që të ndalet zjarri mes dy palëve dhe të fillojnë bisedimet, raporton Reuters.

Turqia po ashtu ka reaguar. Ajo ka thënë se Armenia duhet menjëherë të ndalë armiqësinë ndaj Azerbajxhanit, konflikt sipas Turqisë që do ta fusë “rajonin në zjarr”.

Franca i ka bërë thirrje Bakus që të ndalë përleshjet dhe menjëherë të rifillojë dialogun, pasi Armenia shpalli ligjin ushtarak dhe mobilizoi popullsinë kundër Azerbejxhanit.

“Franca është ekstremisht e shqetësuar nga kontrontimet”, ka thënë ministri i Jashtëm, Agnes bon der Muhll.

Bashkë me SHBA-në dhe Rusinë, Franca është udhëheqëse e grupit të Minskut e cila ndërmjetëson ndërmejt Armenisë dhe Azerbajxhanit.

Përplasjet kanë shpërthyer ndërmjet forcave armene dhe të Azerbajxhanit mbi rajonin e diskutueshëm Nagorno-Karabakh.

Kryeministri i Armenisë, Nikol Pashinyan tha se Azerbajxhani ka hdërmarrë sulm ajror dhe të artilerisë, porse forcat armene i kishin zmbrapsur duke rrëzuar dy helikopterë dhe tri drone, të dielën.

Azerbajxhani ka deklaruar se Armenia ka filluar fushatë bombardimesh përgjatë gjithë vijës së frontit.

Konflikti i gjatë mes tyre është ndezur sërish në muajt e fundit, raporton BBC.

Luftimet kufitare gjatë korrikut lanë të vdekur së paku 16 persona.

Armenia dhe Azerbajxhani kanë qenë pjesë të Bashkimit Sovjetik para shpërbërjes në vitin 1991, transmeton KOHA. Për katër dekaka kanë ngecur në një konflikt të pazgjidhur mbi Nagorno-Karabakh, e njohur ndërkombëatrisht si pjesë e Azerbajxhanit por e kontrolluar nga armenët vendës.

© KOHA.