1 perditesime
14:46

Mlladiqi “nuk është në gjendje të marrë pjesë në seancën kundër dënimit për gjenocid”

Dragan Ivetiq, avokati i ish-shefit ushtarak të serbëve të Bosnjës, Ratko Mlladiq, i ka thënë një gjykate të Kombeve të Bashkuara të martën se klienti i tij rrezikon të përballet me “dështim të drejtësisë”, sepse ai nuk është mendërisht i gatshëm që të marrë pjesë në një seancë kundër dënimit të tij për gjenocid.

Mlladiq ka sfiduar vendimin e vitit 2017 për dënim me burgim të përjetshëm për gjenocid, krime kundër njerëzimit dhe krime lufte, në konfliktin civil në ish-Jugosllavi, duke përfshirë masakrën e Srebrenicës më 1995.

“Unë nuk jam në gjendje të marrë udhëzime në mënyrë të duhur nga Mlladiq, dhe as të sigurohem se ai është i aftë të marrë pjesë” në procedurë, ka thënë Ivetiq, në seancën e zhvilluar pjesërisht përmes video-konferencës, për shkak të pandemisë me koronavirus.

Ai ka thënë se seanca dyditore, që ka nisur të martën, nuk duhet të vazhdojë pa analizuar gjendjen shëndetësore të 77-vjeçarit.

Në një seancë të mbajtur muajin e kaluar, ekipi ligjor i Mlladiqit ka thënë se ish-gjenerali mund të jetë duke u përballur me shenja të para të harresës.

Megjithatë, seanca ka vazhduar pavarësisht kundërshtimeve të avokatit Ivetiq.

Mlladiq është parë në gjykatë me maskë, për shkak të rregullave të nxitura nga koronavirusi, mirëpo më vonë e ka hequr atë plotësisht.

Avokatët e Mlladiqit kanë përsëritur ankesat për gjendjen e tij shëndetësore, mirëpo gjyqtarët kanë thënë se avokatët “nuk kanë ofruar të dhëna se Mlladiq nuk mund të komunikojë, të konsultohet me këshilltarët apo të kuptojë esencën e procedurave”.

09:20

Në Hagë do të nisë apeli i Mlladiqit për burgim të përjetshëm

Gjyqtarët ndërkombëtarë në Hagë pritet të nisin të martën seancën për apelin e komandantit ushtarak të serbëve të Bosnjës, Ratko Mlladiq, kundër dënimit për burgim të përjetshëm për gjenocidin e kryer në masakrën e Srebrenicës dhe për krime tjera.

Seanca dyditore është shtyrë disa herë, pasi 78-vjeçari, ish-gjeneral, ka pasur probleme shëndetësore dhe më vonë shtyrjen e ka nxitur situata me pandeminë e koronavirusit.

Mlladiqi, i konsideruar si Kasapi i Bosnjës, është dënuar me burgim të përjetshëm më 2017 për krime lufte, krime kundër njerëzimit dhe për rolin e tij në luftën civile në Bosnjë në vitet 1990.

Aty përfshihet gjenocidi i kryer nga forcat e tij të serbëve të Bosnjës në një qytezë të Bosnje-Hercegovinës, Srebrenicë, në mesin e vitit 1995.

Kjo ngjarje përbën vrasjet masive më të rënda në Evropë prej Luftës së Dytë Botërore, meqë aty janë vrarë rreth 8,000 burra dhe djem myslimanë, përcjell rel.

Mbrojtja do të flasë e para në Tribunalin që merret me rastet e gjykatave që nuk ekzistojnë më për ish-Jugosllavinë dhe Ruandën.

Më pas do të flasë prokurori.

Mlladiqi do të lejohet t’i drejtohet gjykatës për 10 minuta më 26 gusht.

Ende nuk është bërë e qartë nëse ai do të jetë i pranishëm në sallë apo do të flasë përmes video-linkut, nga qendra e ndalimit në qytetin holandez, Scheveningen.

Mlladiqi ishte larguar nga salla e gjyqit më 2017, pasi pati akuzuar gjyqtarët për gënjeshtra.