SHBA-ja i përgjigjet Rusisë: Qëllimi është të kemi vaksinë të sigurt, jo kush i pari

Sekretari amerikan për Shëndetësi, Alex Azar, ka reaguar ndaj njoftimit të Rusisë pas aprovimit të “vaksinës së parë në botë” kundër koronavirusit.

“Qëllimi s'është të jesh i pari me vaksinën. Qëllimi është të kemi vaksinë të sigurt dhe efikase”, ka thënë Azar në “ABC”.

Azar ka thënë se për një vaksinë të sigurt dhe efikase duhet të ketë të dhëna transparente, nga faza e tretë e testimeve.

“Për këtë presidenti Donald Trump po udhëheq një iniciativë historike, me gjashtë vaksina që janë duke u zhvilluar”, ka thënë Azar.

Ai ka thënë se beson që deri në dhjetor do të kenë miliona doza të vaksinës kundër COVID-19 dhe qindra miliona të tjera më 2021. Sipas tij, dy nga vaksinat janë në fazën e tretë të testimit klinik.

Rusia të martën u bë vendi i parë në botë që aprovoi vaksinën kundër COVID-19. Rusia ka thënë se prodhimi në masë do të fillojë nga shtatori dhe vaksinimi pritet të fillojë në tetor.