22:34

Policia shtyp protestat, ndërsa Lukashenko po pritet të konfirmohet president edhe për një mandat

 

Policia bjelloruse ka hedhur lotsjellës dhe po ashtu ka nisur arrestimet, duke shtypur protestat ndërsa presidenti Alexander Lukashenko, po pritej të konfirmohej president për mandatin e gjashtë me radhë.

Mijëra persona vërshuan rrugët në Minsk, në shenjë solidariteti ndaj opozitës.

Policia ka bllokuar rrugët, duke arrestuar së paku dhjetë persona na një vend në Minsk, ka njoftuar agjencia Reuters. Mediumet bjelloruse kanë raportuar për arrestime dhe përleshje mes policëve e protestuesve si në kryeqendër ashtu edhe në qytete tjera. Sipas një dëshmitari të Reutersit, një person ishte hedhur nga vetura e policisë në Minsk dhe kishte qëndruar shtrirë në tokë pa ndjenja. Qeveria në një komunikatë ka thënë se nuk ka pasur të lënduar në mesin e protestuesve.

Presidenti autoritar Lukashenko, sipas exit-polleve lokale po kryeson me 79.7 për qind të votave, karshi 6.8 për qind sa i ka rivalja kryesore Svetlana Tikhanouskaya.

21:10

Paralajmërohet fitorja e thellë e Lukashenkos, ende pa u mbyllur qendrat e votimit

Edhe para se të mbylleshin vendvotimet në Bjellorusi, kryesorja e komisionit zgjedhor të këtij shteti deklaroi të dielën se rezultatet preliminare tregojnë se presidenti autoritar Alexander Lukashenko udhëheqë dukshëm dhe pritet ta fitojë mandatin e gjashtë rresht.

Lajmërimi nga Lidia Yermoshina që Lukashenko kishte fituar 82% votave në pesë rajone ka gjasa të ndezë tensionet me përkrahësit e opozitës të cilët janë të shqetësuar për shkak ekonomisë në rënie të këtij shteti, represionit politik dhe menaxhimit të keq të pandemisë së koronavirusit, shkruan agjencias AP.

Zgjedhjet presidenciale kanë vendosur Lukashenkon, i cili ka mbajtur shtetin me grusht të çeliktë që nga viti 1994, kundër katër kandidatëve tjerë, dhe ka shkaktuar protestat më të mëdha opozitare në vite. Përkrahësit e opozitës dyshojnë se zyrtarët zgjedhorë do të manipulojnë rezultatet e votimeve në mënyrë që Lukashenko, 65 vjeç, të fitojë mandatin e tij të gjashtë.

Zgjedhjeve presidenciale u mungoni shumë aspekte demokratike. Dy rivalëve të Lukashenkos iu ndalua të garojnë dhe tjetri u detyrua të ikë nga shteti me fëmijët e vet pas paralajmërimeve se do të arrestohej. Tensionet ishin të ngritura gjatë tërë ditës sepse Lukashenko u përbetua se do të shkelte çfarëdo proteste dhe së paku tetë anëtarë të kampanjës për opozitën u arrestuan.

18:36

Tensione në Bjellorusi, arrestohen anëtarë të stafit të kandidates për presidente

Tensione janë shënuar sot në Bjellorusi derisa vendi po i mban zgjedhjet presidenciale. Tetë anëtarë të stafit të sfiduesit kryesor të presidentit autoritar janë arrestuar nga policia dhe një nga figurat kyçe të kampanjës ka ikur nga vendi.

Mbështetësit opozitarë dyshojnë se zyrtarë të zgjedhjeve do të manipulojnë rezultatet për t’i dhënë 65-vjeçarit, Alexander Lukashenko, një mandat të gjashtë. Protestat pritet të ndodhin pas mbylljes së votimit, ndërsa Lukashenko e ka bërë të qartë se nuk do të hezitojë të shtypë secilën demonstratë.

“Nëse provokon, do të marrësh të njëjtën përgjigje”, ka thënë ai, raporton AP.

Edhe pse janë edhe katër kandidatë të tjerë, përveç Lukashenkos, opozita është bashkuar rreth njërit: Sviatlana Tsikhanouskaya.

Kampanja e Tsikhanouskaya ka tërhequr shumë mbështetës, gjë e cila ka ngjallur një zhvillim të pazakonshëm në vend ku zërat e opozitës zakonisht janë të shtypur. Në një nga tubimet e saja në kryeqytet, janë mbledhur rreth 60,000 njerëz.

Në vitin 2010 gjatë zgjedhjeve presidenciale, protestuesit ishin rrahur dhe gjashtë kandidatët rivalë ishin arrestuar, tre prej të cilëve u mbajtën në burg për vite.

Tsikhanouskaya ka bërë thirrje për qetësi.

“Shpresoj se gjithçka do të jetë paqësore dhe se policia nuk do të përdorë forcë”, ka thënë ajo pas votimit të së dielës.

Veronika Tsepkalo, anëtarja kryesore e kampanjës së Tsikhanouskayas, thotë se kutitë e votimit mund të manipulohen.

“Për pesë netë askush nuk i ka mbikëqyrur kutitë e votimit, çka i jep autoriteteve mundësi për manovra”, i thotë ajo AP-së, disa orë para se të ikte nga vendi.

Tsikhanouskaya ka dalë kundër Lukashenkos për mënyrën e menaxhimit të pandemisë.

Me 9,5 milionë njerëz, Bjellorusia ka më shumë se 68,500 raste të konfirmuara me COVID-19 dhe 580 vdekje, por kritikët akuzojnë autoritetet se po manipulojnë me numrin e vdekjeve.

Sipas exit-polleve lokale Lukashenko pritet të fitojë zgjedhjet me mbi 80 për qind të votave.