Koronavirusi, që po përhapet me shpejtësi, ka prekur rreth tetëdhjetë shtete, teksa më shumë raste tani raportohen jashtë Kinës, burimit të këtij virusi, raporton Reuters, transmeton Koha.net.
-Në tërë botën janë shënuar mbi 94.000 raste dhe 3.220 persona kanë vdekur, sipas shifrave të Reutersit.
-Në Kinën kontinentale janë konfirmuar 119 raste të reja të martën, një rënie kjo krahasuar më 125 raste sa u konfirmuan një ditë më parë. Numri i përgjithshëm i rasteve të konfirmuara ka arritur në 80.270, derisa ai i vdekjeve në 2.981, deri më 3 mars.
-Korea Jugore ka raportuar qindra raste të reja, teksa shumë të sëmurë janë detyruar të presin për shtretër nëpër spitalet në Daegu, epiqendër e koronavirusit në këtë shtet. Rastet e reja e ngrisin në 5.621 numrin e përgjithshëm të të infektuarve në këtë shtet, krahas 32 rasteve të vdekjes.
-Franca ka 285 raste të konfirmuara të koronavirusit, ka deklaruar të mërkurën kryetari i Institutit të Shëndetit Publik në Francë, Jerome Salomon, apo 73 raste më shumë, krahasuar me një ditë më parë.
-Presidenti i Koresë së Jugut e anuloi një vizitë të planifikuar kah mesi i marsit për në Emiratet e Bashkuara Arabe, Egjipt dhe Turqi.
-Numri i përgjithshëm i të vdekurve nga koronavirusi në Itali ka mbërritur në 107 të mërkuren, me 24 viktima nga ky virus brenda vetëm 24 orëve.
-Virusi është përhapur në pothuajse të gjitha provincat e Iranit, ka deklaruar të mërkurën presidenti i këtij shteti, Hassan Rouhani. Irani ka më shumë se 2.900 raste të konfirmuara dhe 92 të vdekur.
-Hungaria dhe Sllovenia kanë konfirmuar rastet e para të koronavirusit. Në Hungari, fjala është për dy studentë iranianë në këtë shtet.
-Irlanda Veriore të mërkurën ka konfirmuar edhe dy raste tjera të koronavirusit.
-Iraku të mërkurën ka raportuar për rastin e dytë të vdekjes nga koronavirusi, në Bagdad.
-Edhe një person ka vdekur në Seattle të SHBA-së, duke e sjellë numrin e të vdekurve atje në dhjetë, kanë deklaruar të mërkurën zyrtarët amerikanë. Raste të reja të koronavirusit ndërkaq janë raportuar në dy qytetet më të populluara në SHBA – katër në afërsi të New Yorkut dhe gjashtë në Los Angeles.
-Numri i rasteve të konfirmuara të koronavirusit në Britani është ngritur në 85 të mërkurën, rritja kjo më e madhe brenda 24 orëve, që nga rasti i parë në këtë shtet.
-Numri i rasteve të konfirmuara në Japoni e ka kaluar 1.000-shin, teksa qeveria ka ritheksuar se nuk ka sprapsje nga planet për Lojërat Olimpike në Tokio gjatë korrikut.
-Numri i përgjithshëm i rasteve të konfirmuara të koronavirusit në Indi ka arritur në 29 të mërkurën, përfshirë 16 turistë italianë.
-Autoritetet shëndetësore spanjolle kanë deklaruar të mërkurën se kanë konfirmuar 193 raste me koronavirus në Spanjë, përfshirë tre fëmijë. Të martën, Spanja ka raportuar rastin e parë të vdekjes.
-Gjashtëmbëdhjetë raste të reja janë konfirmuar në Stockholm, kanë deklaruar të mërkurën autoritetet suedeze, duke e ngritur në 52 numrin e përgjithshëm të rasteve në Suedi.
-Ministri polak i Shëndetësisë e ka konfirmuar të mërkurën rastin e parë në këtë shtet.
-Shkencëtarët në Kinë thonë se kanë gjetur dy lloje të këtij virusi që po përhapen midis njerëzve dhe po i shkaktojnë infeksionet.
-Veterinarët kanë thënë të mërkurën se qeni i një pacienti me koronavirus, që mbahej në karantinë në Hong Kong, mund të jetë rasti i parë i bartjes së këtij virusi prej kafshës tek njeriu.
-Taxhikistani të mërkurën iu ka kërkuar qytetarëve që t’i shmangen faljes së xhumasë, ndonëse në këtë shtet të Azisë Qendrore nuk është raportuar ndonjë rast deri më tani.
-Shitoret në Australi kanë vënë kufij mbi numrin e letrave të tualetit që mund të blihen, pas zhdukjes së tyre nga raftet të mërkurën, teksa në këtë shtet është regjistruar rasti i tretë.
-
4 mars 2020 23:31
-
Shpërndaje në: