Robert C. O’Brien emërohet në vend të John Boltonit

Robert C. O’Brien emërohet në vend të John Boltonit

18 September 2019 15:47

Presidenti amerikan Donald Trump ka emëruar Robert O’Brien si Këshilltar për Siguri Kombëtare të mërkurën, tetë ditë pas largimit të John Boltonit.

O’Brien, zyrtar i lartë i Zyrës së të Dërguarit Special Presidencial për Çështje të Pengjeve, do të bëhet këshilltari i katërt i sigurisë për Donald Trumpin, pasi para Boltonit, nga kjo pozitë ishin larguar Michael Flynn dhe H.R. McMaster.

Puna e tij së fundmi ka qenë lidhur me çështjet e pengjeve në SHBA. Ai ishte caktuar nga Trumpi për të ndihmuar në lirimin e reperit A$AP Rocky, që ishte ndaluar në Suedi nën akuzat për vrasje. Reperi u shpall fajtor, por u lirua nga burgimi.

O’Brien ishte po ashtu këshilltar i jashtëm i Mitt Romneyt gjatë garës presidenciale në vitin 2012.

O’Brien kishte vizituar Zyrën Ovale në mars, kur Trumpi kishte përshëndetur lirimin e një qytetari amerikan që mbahej në Jemen. Presidenti e kishte vlerësuar O’Brienin si negociuesin më të mirë.

“Kam punuar gjatë dhe shumë me Robertin. Ai do të bëjë punë të madhe”, ka thënë Trumpi në përzgjedhjen e O’Brienit, raporton “cnbc”, transmeton Koha.net.

Këshilltari për Siguri Kombëtare nuk ka nevojë për konfirmim nga Senati. Pozicioni vjen me staf prej qindra specialistësh nga Pentagoni, Departamenti i Shtetit dhe Agjencitë e Inteligjencës. Shtëpia e Bardhë, Pentagoni e Departamenti i Shtetit nuk kanë komentuar përzgjedhjen e presidentit.

Boltoni, që ishte emëruar këshilltar i sigurisë kombëtare në mars të 2018-s, ishte i njohur për qasjen e tij të ashpër në politikën e jashtme. Trumpi në njoftimin e 10 shtatorit deklaroi se kishte mospajtime të shumta me Boltonin dhe se për këtë e ka shkarkuar. Në anën tjetër, Bolton kishte thënë se është dorëhequr.

© KOHA. Të gjitha të drejtat janë të rezervuara.

Komentet

Shto koment

Të ngjashme