1 perditesime
12:42

Gjykata hungareze refuzon ekstradimin e Gruevskit

Një gjykatë në Budapest ka refuzuar kërkesën e Maqedonisë Veriore për ekstradimin e ish-kryeministrit të saj, Nikola Gruevski.

Gruevski iku nga Maqedonia Veriore nëntorin e vitit të kaluar për t’i ikur dënimin me burg prej 2 vjetësh për korrupsion dhe më vonë fitoi statusin e azilantit në Hungari, raporton AP.

Gjykata e Budapestit tha të enjten se kërkesa për ekstradim nuk mund të aprovohet pasi që sipas ligjit, njerëzit që marrin azilin nuk mund të ekstradohen në vendin nga ku kanë ikur, transmeton Koha.net.

Gruevski, i cili drejtoi vendin për një dekadë deri më 2016, është një aleat i kryeministrit hungarez, Viktor Orban, dhe shkoi në Hungari pasi udhëtoi përmes disa vendeve ballkanike në vetura diplomatike hungareze dhe ishte i shoqëruar nga diplomatë hungarezë.

Më herët gjatë muajit, ministri i Jashtëm hungarez, Peter Szijjarto, u tha deputetëve se takohet vazhdimisht me Gruevskin në zyrën e tij për t’u konsultuar rreth çështjeve për Ballkanin Perëndimor.

11:47

Ish-kryeministri maqedonas Gruevski arrestohet në Budapest

Ish-kryeministri maqedonas, Nikolla Gruevski, është arrestuar nga policia hungareze në Budapest.

Për ekstradimin e ish-kryeministrit Gruevski sot do të vendosë gjykata e Budapestit.

Se çfarë vendimi do të merret do të mësohet pas seancës, pasi është e mbyllur për publikun, shkruan oranews.

Sipas medieve hungareze, Gruevski u arrestua mëngjesin e sotëm në Budapest pas kërkesës së gjykatës.

Nga videoja shihet Gruevski që i fsheh prangat në duar me xhaketë.

Maqedonia e Veriut kërkoi ekstradimin për vuajtjen e dënimit me burg prej dy vjetësh për lëndën e PSP “Tanku” si dhe ngjarjet e përgjakshme në Kuvend për të cilët dyshohet se ka qenë organizator.