Berisha: Kërkesa për dëmshpërblim ndaj Kelmendit do të jetë milionëshe
Pëlqeje KTV Video për të parë video të përzgjedhura nga KOHA
Duke qenë se gjasat që rasti ndaj Naser Kelmendit të parashkruhet pas 3 muajve janë pothuajse të pashmangshme, edhe dëmi që do shkaktohet për buxhetin e shtetit do jetë i madh. Kjo pasi, mbrojtësi i të akuzuarit, Besnik Berisha paralajmëron kërkesë për kompensim miliona euro, për kohën e kaluar në paraburgim dhe siç thotë ai përkeqësimit të shëndetit të klientit të tij, si pasojë e qëndrimit në paraburgim.
“Absolutisht, kërkesa do të jetë milionëshe. Ai ka pas gjatë qëndrimit të tij, gjatë pingpongut sa është luajtur me Naser Kelmendin, herë në arrest shtëpiak, herë në paraburgim, shëndeti i tij është shkatërruar. Ka pas prova që gjykata ka angazhuar ekspertë ndërkombëtar për vlerësimin e shëndetit të tij, jo ekspertë të thjeshtë të letrave, po ekspertë ndërkombëtar kanë konstatuar që d.m.th. që shëndeti i tij ka qenë i përkeqësuar që në muajt e parë të paraburgimit. Është mbajtur në kushte izolimi në Dyz, në kushte izolimi në Prishtinë, d.m.th. ka qenë në prag të infarktit, ka pas probleme, enorme e serioze me shëndetin”, ka thënë Berisha.
Duke qenë se Naser Kelmendi ka qëndruar në paraburgim dhe arrest shtëpiak 4 vjet e 5 muaj dhe dënimi i tij me burgim prej 4 vjet e 8 muaj nuk do të arrijë plotfuqishmërinë e tij, atëherë Kelmendi do të mund të kërkojë kompensim dëmi nga Këshilli Gjyqësor i Kosovës për periudhën në të cilën ishte privuar nga liria.
Sipas Udhëzimit Administrativ (04/2015) për zbatimin e procedurës për kompensimin e dëmit për personat e dënuar ose të arrestuar pa arsye, i njëjti ka të drejtë në paraqitjen e kërkesës për kompensim dëmi në shumën prej afërsisht 24,180.00 euro, pa përfshirë shpenzimet për avokat, për vizita familjare, dërgim të pakove dhe të transportit dhe nëse i njëjti ka pasur të themeluar marrëdhënie pune me kontratë.
Nëse i njëjti nuk pajtohet me këtë shumë, lind e drejta të drejtohet me padi në gjykatën kompetente për kompensim të dëmit.
Ky rast dhe raste të tjera janë shembull i dështimit të drejtësisë kosovare, se si Republika e Kosovës ende nuk ka arritur të ndërtojë një sistem gjyqësor, i cili do të garantonte secilit individ gjykimin brenda afateve të arsyeshme kohore, ashtu siç edhe kërkohet me standarde ndërkombëtare.
Naser Kelmendi, i njohur ndryshe si “bosi i drogës” në Ballkan, i cili thuhet se zotëron një sërë pronash, hotele në Mali të Zi e Sarajevë dhe posedon pasuri milionëshe, për shkak të mosadministrimit të duhur të drejtësisë dhe neglizhencës së saj në këtë rast, rrezikon të mbetet i pagjykuar me një vendim të formës së prerë për akuzat e pretenduara ndaj tij. Për më tepër, ai mund të përfitojë edhe qindra mijëra euro, si dëmshpërblim nga shteti i Kosovës për kohën e kaluar në paraburgim dhe arrest shtëpiak.
Ndryshe, më 18 maj 2023 në proces të rigjykimit, Naser Kelmendi është dënuar me 4 vjet e 8 muaj burgim, për “Posedim i paautorizuar me qëllim shpërndarjen, shpërndarjen apo shitje dhe/ose eksport/import i paautorizuar i narkotikeve të rrezikshëm”, në kundërshtim me nenin 229, paragrafët 1, 2 dhe 3 të KPK.
Për më shumë ndiqeni hulumtimin “Shteti dështon të ndajë drejtësi për Naser Kelmendin të njohur si “bosi i drogës”, i cili transmetohet në KTV, TV Arta dhe “Betimi për Drejtësi”.
