BETIMI PËR DREJTËSI

Mbi 650 mijë qytetarë janë në kredi, kanë mbi 5 miliardë euro borxhe nëpër banka

Sipas Bankës Qendrore, aktualisht figurojnë 653 mijë e 634 kredimarrës që kanë një apo më shumë kredi aktive në të gjithë sektorin financiar.

Borxhi aktual i qytetarëve të Kosovës që kanë nëpër bankat komerciale, ka kapur shifrën e mbi 5 miliardë eurove.

Në tre vitet e fundit, përfshirë edhe janarin e vitit 2023, qytetarët kanë marrë 1 mijë 561 kredi hipotekare, për të blerë banese ose shtëpi.

Vlera e këtyre kredive në tri vitet e fundit, deri më 1 shkurt të këtij viti, është mbi 128 milionë euro.

Këto kredi janë dhënë për periudha kohore duke filluar prej 5, 10, dhe mbi 10 vjet.

Për një familje prej 4 anëtarësh, minimumi i hapësirës së një banese që konsiderohet e nevojshme është rreth 80 metra katrorë. Për të blerë një banesë të tillë, me këto paga mesatare nuk do mjaftonte as kredia e dhënë për 15 vite.

“Vlerësoj që një hapësirë banesore dikun afër 80 metra katrorë, vlerësoj që i plotëson kushtimisht në mënyre optimale sepse jo diçka me jetu me luks, vlerësoj që i plotëson për faktin që, dy dhoma gjumi një hapësirë e ndejës”, thotë eksperti i ekonomisë Mustafë Kadriaj.

Edhe eksperti tjetër i ekonomisë, Lekë Musa, thotë se është e vështirë që një familje mesatare të blejë banesë në Prishtinë.

“Tani bankat ofrojnë kredi deri në 15 vite, e besojë se një kredi prej 15 vitesh për të ble një banesë në qendër të Prishtinës për një familje të tillë mesatare është e vështirë, domethënë ato duhet ose s’paku të shohin jashtë domethënë, jashtë Prishtinës ku çmimi i metrit katror është nër 1 mijë euro, dhe që të ketë një kredi bankare së paku për 15 vite domethënë për të arritur për të blerë një banesë”.

Por sa janë çmimet e banesave në qendër të Prishtinës dhe përreth saj?

“Po në përgjithësi është një rengj i madh fillon prej 800, ka edhe raste 700 deri në 2000-2500 në qendër. Kjo krejt varet prej materialit ndërtues d.m.th. kualitetit të ndërtimit lokacioni edhe çështjeve të tjera subjektive. Viteve të fundit e kemi vërejte që blerësi është vetëdijesua edhe tash po kërkon kualitet më të mirë të ndërtimit njëkohësisht edhe ndërtuesit janë vetëdijësu edhe ata po përdorin material më të mirë të ndërtimit edhe në këtë mënyrë për shkak të inflacioneve dhe çështjeve tjera janë ngritë edhe çmimet e lëndës bazë për ndërtim edhe kjo ka rezultu edhe me ngritjen e çmimeve në përgjithësi”, ka thënë Milot Mehmeti nga agjencia për patundshmëri, “Pro Real Estate”.