Stellantis, grupi që ka 14 marka, përfshirë Fiatin, ka njoftuar se po pezullon përkohësisht prodhimin e modelit 500e për shkak të kërkesës së dobët. Përveç kësaj, grupi ka njoftuar edhe ndërprerjen e prodhimit të katër modeleve Maserati, të cilat prodhohen në fabrikën Mirafiori në Itali. Në tetë muajt e parë të vitit 2023, Fiat 500e ishte vetëm vetura e gjashtë elektrike më e shitur në Evropë. Nga janari në gusht, shitjet e modelit italian ranë me 1.7% krahasuar me të njëjtën periudhë të vitit 2022. Për këtë arsye u ngrit alarmi.
Ky vendim i referohet prodhimit të versionit elektrik të Fiat 500e, i cili prodhohet në Itali. Modeli është ende i disponueshëm në versionin me motorë SUS, i cili prodhohet në Poloni, në fabrikën Tychy.
Së bashku me Fiat 500e, Stellantis njoftoi edhe ndërprerjen e prodhimit të katër modeleve Maserati që prodhohen në të njëjtën fabrikë. Këto janë modelet: Ghibli, Quattroporte, Levante dhe GranTurismo. Prodhuesi italian do të ndërpresë plotësisht modelin Ghibli në fund të vitit.
Sipas një zëdhënësi të Stellantisit, aktiviteti i fabrikës Mirafiori do të ndërpritet këtë javë. E njëjta fabrikë do të vazhdojë të funksionojë, por përsëri do të duhet të ndalojë prodhimin e veturave midis 19 tetorit dhe 3 nëntorit. Në këtë fabrikë janë të punësuar rreth 2400 punëtorë. Asnjëri prej tyre nuk do të paguhet gjatë pushimit.
Për të njëjtën arsye, VW Group së fundmi, ndër prodhuesit e parë evropianë, njoftoi pezullimin e përkohshëm të prodhimit në dy fabrika gjermane, në Dresden dhe Zwickau. Kjo lëvizje solli largimin nga puna të plotë të 269 punëtorëve me kontratë me afat të caktuar. Megjithatë, situata është më e ndërlikuar nga sa duket. Komisioni Evropian ka njoftuar hetim për subvencionet e padrejta kineze, të cilat dyshohet se kanë mundësuar një pozicion shumë më të mirë të veturave elektrike kineze në Evropë. Megjithatë, nuk janë vetëm kinezët fajtorë për dështimin e evropianëve.
© KOHA. Të gjitha të drejtat janë të rezervuara.
