Auto

Shpaloset supervetura e re e Lamborghinit

Viti 2023 shënon ditëlindjen e 60-të të Lamborghinit. Si dhuratë, gjiganti i veturave vetes ia ka bërë lansimin e një superveture të re me motor me 12 pistona, V12. Bëhet fjalë për Lamborghini Revuelto.

Revuelto është zëvendësues i Aventadorit, që ishte i suksesshëm për 11 vjet. Vetura e re tashmë ka siguruar shitjet në dy vjetët e para, për shkak të numrit të madh të paraporosive.

Vetura është model hibrid, për herë të parë në histori të brendit italian. “Bisha” vjen me motor 6.5-litërsh V12, që prodhon 814 kuajfuqi. Është motori më i fuqishëm V12 në histori të Lambos. Sistemi hibrid përdor baterinë që funksionon me tre motorë, dy përpara dhe një prapa. Tre motorët elektrikë të kombinuar me motorin V12 me djegie, bashkë ofrojnë 1001 kuajfuqi.

Modeli ka marsh me tetë shpejtësi.

Shefi teknik, Rouven Mohr, ka thënë për “Auto-Express” se vetura ka edhe zë më të fuqishëm.

Revuelto arrin përshpejtimin nga 0 në 100 kilometra për orë për vetëm 2.5 sekonda. Top-shpejtësia që mund ta arrijë është 350 kilometra për orë.

Lambo planifikon që deri më 2024 të lansojë të paktën nga një veturë hibride të të gjitha modeleve. Deri më 2028, pritet që të vijë modeli i parë tërësisht elektrik, si pasues i Urusit.

{gallery}