Kompania Mercedes-Benz ka konfirmuar se punonjësit e saj dyshohen për korrupsion që ka të bëjë me miliona euro në fabrikën në Sindelfingen.
Mercedes konfirmoi për BILD-in se kompania është përfshirë në skandalin e korrupsionit vetëm si viktimë.
“Ne po hetojmë dy persona të dyshuar për korrupsion dhe marrje ryshfeti në operacione biznesi”, ka thënë kryeprokurori publik Aniello Ambrosio.
Sipas informacioneve të përditshmes gjermane bëhet fjalë për miliona euro. Rrethet e korporatave po flasin për një nga rastet më të mëdha të zbuluara të ryshfetit në Mercedes.
Raportet fillestare thonë se të pandehurit arritën të përdornin truke të shkathëta për të siguruar që disa furnizues të fitonin kontratën dhe u shpërblyen shumë për të.
“Ne jemi pala e dëmtuar në këtë rast dhe kemi bërë një ankesë”, ka thënë zëdhënësi i Mercedesit, Johannes Leifert, përgjegjës për çështjet ligjore në Mercedes.
Në fund të javës së kaluar, policia mbërriti në Mercedes dhe kontrolloi ambientet e fabrikës në Sindelfingen. Më pas të dyshuarve iu konfiskuan kompjuterët dhe celularët.
Shumë njerëz pyesin pse me rastin u mor policia kriminale e shtetit dhe jo forca e policisë lokale. Informacioni i disponueshëm, sipas BILD, tregon se bëhet fjalë për një korrupsion shumë kompleks me përmasa të mëdha që po vazhdon prej shumë vitesh.
E ndërsa ekspertët e policisë për krimin ekonomik po krehin fabrikën, veçanërisht departamentin e prokurimit, Mercedes ka thënë se mbështet plotësisht autoritetet në hetim dhe përmbahet nga çdo koment.
Fabrika e Mercedesit në Sindelfingen punëson 35 mijë punëtorë dhe produktet më të rëndësishme të saj janë klasa E dhe S, si dhe EQS elektrike. Aty ndodhet edhe qendra e kërkimit dhe zhvillimit të Mercedesit.
© KOHA. Të gjitha të drejtat janë të rezervuara.
