Dacia ka shpalosur planet për një model të ri SUV duke konfirmuar se një model i bazuar në konceptin Bigster do të lansohet më 2025. Versioni i prodhuar i Bigsterit do të jetë pjesë kyçe e planit të Dacias për të kapitalizuar tregun në segmentin e SUV-ave.
Bigsteri shihet si model i rëndësishëm i brendit. Kompania rumune ka treguar se Bigsteri do të shfrytëzojë platformën e njëjtë prodhuese si modeli Sandero, veçse modeli i ri do të jetë më i madh. Para se ta lansojë Bigsterin, pritet të lansohet një model i ri Duster.
Dacia pati prezantuar konceptin e Bigsterit më 2021. Fotografitë e “Auto-Express” kanë treguar se si mund të duket vetura e re pasi të prodhohet. Kompania ka konfirmuar se SUV-i do të jetë i gjatë 4.6 metra, pothuajse njëjtë si Land Rover Discovery Sport dhe më i madh se Volkswagen Tiguan.
+ 4
Brendi ka premtuar edhe hapësirë më të madhe të brendshme, por s’është e qartë nëse do të ofrojë modelin me shtatë ulëse. Po ashtu nuk pritet që të vijnë motorët e vegjël benzinë, me 64 kuajfuqi, por që do të prodhohen modele që nisin me së paku 89 kuajfuqi. Po ashtu pritet të vijnë edhe modele me 128 kuajfuqi. Është paralajmëruar edhe një version hibrid, që do të vijë i kombinuar me motorin 1.6-litërsh e 138 kuajfuqi.
Dacia pritet të mos e humbë “imazhin e çmimeve të lira” me Bigsterin. Kompania ka paralajmëruar se çmimet do të vazhdojnë të jenë të njëjta. “Auto-Express” ka raportuar se një veturë e tillë do të kushtojë rreth 22 mijë euro.
Dacia është një nga brendet më të shitura në Kosovë, sa i përket tregut të veturave të reja.
