Nissani mund të shesë dy fabrika në Evropë

Nissani mund të shesë dy fabrika në Evropë

27 October 2019 16:46

Duke iu referuar burimeve të njohura me temën, mediumi amerikan “Bloomberg” raporton se Nissan tashmë po përcjell interesimin e klientëve të mundshëm për fabrikat e tij në Britani të Madhe dhe Spanjë.

Një tjetër mundësi që prodhuesi po teston është të shesë njërën nga fabrikat, pasi pjesa e tregut të markës në Evropë ka rënë. Edhe pse ende nuk ka ndonjë vendim përfundimtar, disa ndërmarrje kineze janë ndër blerësit e mundshëm të këtyre fabrikave.

Fitimi i Nissanit ka rënë në pothuajse zero gjatë gjysmës së parë të vitit, me shefin ekzekutiv të ri Makoto Uchida që përballet me probleme në fillim të mandatit të tij.

Megjithatë, zëdhënësi i Nissanit, Azusa Momose, tha se për momentin prodhuesi japonez nuk planifikon të shesë dy fabrikat e tij në Evropë.

Nissani, po ashtu, në korrik njoftoi se planifikon të shkurtojë 12,500 vende pune në të gjithë botën, pasi dëshiron të përqendrohet në tregun e tij të shtëpisë, si dhe në Kinë dhe SHBA.

Përveç kësaj, Nissani po konsideron të importojë modelet e tij në Evropë direkt nga Japonia, tani që barrierat tregtare me BE-në janë hequr. Nëse ai bën një veprim të tillë, atëherë nuk do të ketë më nevojë për fabrika në rajon.

Gjithashtu, prodhuesi japonez planifikon të zvogëlojë një numër modelesh jo-fitimprurëse, duke përfshirë markën Datsun me buxhet të ulët si një e tërë. Nissan Micra thuhet se është njëri prej tyre.

Nissani tashmë ka njoftuar një seri masash për uljen e kostove në Evropë, përfshirë eliminimin e 600 vendeve të punës në fabrikën e tij në Barcelonë, e cila aktualisht operon me një kapacitet nën 200,000 automjete në vit.

Fabrika në Sunderland të Britanisë së Madhe ka qenë gjithashtu në fokus, pasi Nissani paralajmëroi autoritetet lokale që Brexiti do ta bënte objektin të paqëndrueshëm pa një marrëveshje./ksp

Komentet

Shto koment

Të ngjashme