Zhvendosja nga objekti i Gjimnazit gjuhësor kundërshtohet me protestë në Prishtinë

Nxënës dhe mësimdhënës të gjimnazit “Ahmet Gashi” në Prishtinë kanë protestuar të enjten për gati dy orë, duke e kundërshtuar vendimin e Komunës së Prishtinës për mbylljen e kësaj shkolle dhe zhvendosjen në dy objekte të tjera shkollore. Protestën kanë paralajmëruar ta vazhdojnë edhe të premten nga ora 08:00 e mëngjesit.

Komuna e Prishtinës muajin e kaluar ka marrë vendim për dislokimin e nxënësve në dy objekte shkollore. Kjo pas një vlerësimi që i është bërë objektit të shkollës “Ahmet Gashi” e ku ka rezultuar se nuk ka stabilitet dhe nuk i plotëson kushtet për zhvillimin e procesit edukativ-arsimor. Sipas vendimit, nxënësit e klasës së 10-të të zhvendosen në shkollën fillore “Emin Duraku”, ndërkaq nxënësit e klasës së 11-të dhe 12-të të zhvendosën në objektin e gjimnazit “Sami Frashëri”, shkruan sot Koha Ditore.

Drejtoresha e Arsimit në Komunën e Prishtinës, Shpresa Shala, ka bërë të ditur se të enjten kanë arritur një marrëveshje me mësimdhënësit dhe drejtorin e shkollës që zhvendosja të bëhet që nga e hëna. Megjithatë, mësimdhënësit e kanë konfirmuar se ende nuk kanë vendosur nëse do ta pranojnë vendimin e Komunës.

(Artikullin e plotë mund ta lexoni në numrin e sotëm të Kohës Ditore)