Ward: Zëri i grave të Drenasit do të përçohet edhe në Parlamentin Europian

Kryetari i Komunës së Drenasit, Ramiz Lladrovci dhe eurodeputetja e Parlamentit Europian, Julie Ward kanë vizituar Kadire Tahiraj drejtoreshë e Qendrës për Promovimin e Drejtave të Grave në Drenas dhe aktivistet e kësaj organizate.

Eurodeputetja e Parlamentit Europian, Julie Ward, gjatë vizitës që i ka bërë organizatës që promovon dhe mbron të drejtat e grave, ka thënë se i përkrahë dhe mbështet aktivitetet e tyre.

Ajo është shprehur e kënaqur me punën e grave të kësaj organizate dhe ka thënë se zëri i tyre do të përçohet edhe në Parlamentin Europian për mbrojtjen dhe të drejtat e tyre. Gjatë qëndrimit në organizatë, ajo ka vizituar edhe ekspozitën e punëve të tyre artizanale dhe është ndarë e kënaqur me vullnetin që kanë arritur të punojnë punime të ndryshme të artizanateve me motive kombëtare.

Ndërsa kryetari i Komunës, Ramiz Lladrovci ka njoftuar se Komuna e Drenasit është mbështetëse dhe përkrahëse e kësaj organizate ku i ka siguruar ambiente për zhvillimin e aktiviteteve.