VV: Etiketimi i gjyqtares nga Rama, tendencë për ta mbuluar dështimin e vet

Etiketimi i gjyqtares Vlora Pacolli është tendencë nga kryetari i Prishtinës, Përparim Rama, për ta mbuluar dështimi e vet evident, thuhet në reagimin e Lëvizjes Vetëvendosje të premten mbrëma, pas vendimit të Gjykatës Komerciale për pezullimin e punës për ndërtimin e “Rrugës A”.

Kryetari i Prishtinës, Përparim Rama, njoftoi sot se Komercialja vendosi të pezullojë punët për ndërtimin e “Rrugës A”, vendim të cilin e konsideroi politik e për të cilin pretendon se është marrë nga gjykatësja Vlora Pacolli, që sipas Ramës, është motra e deputetes së VV-së, Fitore Pacolli. Edhe kryetari i LDK-së, Lumir Abdixhiku, akuzoi Vetëvendosjen për ndikim në vendimin e Komerciales.

Por VV-ja ka thënë se vendimi i sotëm i Komerciales është pasojë e "qasjes anti-institucionale dhe anti-ligjore të ekzekutivit të Komunës së Prishtinës".

“Janë të freskëta reagimet e shumta që janë bërë nga organizata joqeveritare që përcjellin aktivitetet e prokurimit në Komunën e Prishtinës dhe mediat e vendit kur është shpallur fituesi i këtij projekti. Edhe ne si LVV, përmes asamblistëve tanë në Kuvendin Komunal, kemi shprehur dyshimet tona në lidhje me procedurat dhe kemi bërë thirrje për transarencë e zbatim të normave ligjore. Vendimi i sotshëm i Gjykatës Komerciale është pasojë e qasjes së vazhdueshme anti-institucionale dhe anti-ligjore të ekzekutivit të Komunës së Prishtinës. Kujtojmë që edhe disa rrugë të tjera të qytetit, si shkak i vendimeve të jashtligjshme të Kryetarit Rama, janë nën masën e sigurisë së gjykatave. Gjithashtu është inicuar kontest gjyqesor nga MAPL ndaj Komunes së Prishtinës për moszbatim të vlerësimeve ligjore siç parashihet me Ligjin për Vetëqeverisje Lokale dhe me Kushtetutën e Republikës së Kosovës. Gjithandej nëpër matjet e të gjitha organizatave, Komuna e Prishtinës prinë për vendime e veprime të paligjshme”, thuhet në reagimin e VV-së, dega në Prishtinë, në Facebook.

VV-ja ka thënë se shpresojnë për trajtim të shpejtë dhe të drejtë nga Komerciale në mënyrë që “Rruga A” të finalizohet dhe të jetë në shërbim të qytetarëve.

Edhe Arbëri 20 tet 2023 Komercialja i reagon Ramës: Gjyqtarët duhet të lihen të punojnë të pavarur

“Është për çdo kritikë dhe për t’u denuar reagimi i Kryetarit të Prishtinës në lidhje me këtë çështje. Etiketimi i gjyqtares së rastit dhe deklarimi se vendimi është politik e ka për qëllim bllokimin e projekteve në Prishtinë, është tendencë e Përparim Ramës për ta mbuluar dështimin e vet të pashmangshëm dhe tashmë evident. Shpresojmë në trajtim të shpejt dhe të drejtë të çështjes meritore të rastit nga ana e Gjykatës Komerciale, në mënyrë që rruga A, si një projekt jetik i banorëve të asaj zone dhe i rëndësisë së veçantë për Kryeqytetin, të finalizohet dhe të jetë në shërbim të qytetarëve. I gëzohemi dhe mbështesim çdo projekt që bëhet në Prishtinë e për Prishtinën, natyrisht gjithmonë duke respektuar rregullat dhe procedurat ligjore”, vijon reagimi i VV-së.