Universitetet vuajnë nga politizimi

Komisioni për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi, i kryesuar nga kryetari Ismajl Kurteshi, ka pritur sot përfaqësues të organizatave të shoqërisë civile, që janë pjesë e Koalicionit për Integritet dhe Transparencë në Universitete të Republikës së Kosovës.

Përfaqësues të shoqërisë civile, pjesë e Koalicionit për Integritet dhe Transparencë në Universitete të Republikës së Kosovës, para anëtarëve të Komisionit paraqiten një varg problemesh dhe shqetësimesh që kanë hasur gjatë hulumtimeve në arsimin e lartë.

Sipas gjetjeve nga këta përfaqësues, hulumtimet kishin të bënin me: politizimin e universiteteve, shitjen e diplomave, mungesën e literaturës për studentë, plagjiatura në punimet shkencore, mosllogaridhënia dhe jotransparenca etj. Po ashtu, çështje shqetësuese u paraqit edhe shkarkimi i bordeve pa ndonjë arsyetim, si dhe avancimet akademike në arsimin e lartë.

Komisioni u ofroi mbështetje dhe bashkëpunim të mëtutjeshëm përfaqësuesve të shoqërisë civile, në mënyrë që të evitohen parregullsitë dhe problemet që mund të ndodhin në të ardhmen.