Ish-kryeministri britanik, Tony Blair, përmes një videomesazhi ka uruar popullin e Kosovës në 20-vjetorin e çlirimit.
Duke kujtuar vendimin e NATO-s për intervenim në Kosovë, Blair ka thënë se nuk ishte vendim i lehtë.
“Në fillim të 99-s, NATO mori një vendim historik për të intervenuar për të ndaluar humbjen emëtejme jetëve të Kosovës, për të mbrojtur të drejtat e njeriut e për të siguruar stabilitetin në rajon e Evropë”, ka thënë ai.
Në videomesazhin e tij, Blair ka thënë se e kanë ditur se Kosova do të ketë rrugë të vështirë përpara, por ka shtuar se ka pasur besim te qytetarët e Kosovës.
Ai ka shtuar se për të ardhmen duhen vendime të vështira, por është zotuar se do të provojë edhe personalisht që të arrihet paqja afatgjate në Ballkan.
Edhe
Tony Blair kujton intervenimin e NATO-s në Kosovë
“Sigurisht dimë se ka shumë sfida përpara. Krijimi i një paqe të qëndrueshme merr kohë, punë të vështirë e kurajë. Por besoj se dëshira dhe lidershipi është aty. Progresi kërkon vendime të vështira. Por e keni bërë këtë më parë dhe besoj se mund ta bëni prapë. Kam besim të thellë se ballkanikët do të kalojnë sfidat e gjata dhe të zënë vendin e merituar në botë. Teksa reflektojmë për gjeneratat e kaluara, vendosmëria jonë për të siguruar paqe duhet të vazhdojë. Personalisht zotohem se do të bëj gjithçka që mundem për të arritur paqen afatgjate dhe të vendosim shtetet e Ballkanit në zemër të Evropës”, ka shtuar ai.
“Qytetarëve të Kosovës u them se ishim në anën tuaj dhe jemi akoma. Keni vuajtur shumë, por e keni tejkaluar. Duhet të ndërtoni të ardhmen për njerëzit tuaj, në një shtet të pavarur, sovran e brenda familjes evropiane. Kam besim se ky vizion mund dhe do të jetë e ardhmja për qytetarët e Kosovës”, ka deklaruar më tej Blair.
