Pas dekretimit të presidentit të Shqipërisë, Ilir Meta, të dielën zhvillohen zgjedhjet e pjesshme për kryetar të gjashtë bashkive në këtë vend, në Dibër, Durrës, Lushnje, Rrogozhinë, Shkodër dhe Vorë.
Të drejtën e votës e kanë 654,538 qytetarë të regjistruar në listat e zgjedhësve si banorë të këtyre bashkive.
Procesi zgjedhor administrohet nga 13 komisione zonale të Administrimit Zgjedhor (KZAZ), si dhe 941 Komisione të Qendrave të Votimit (KQV).
Partitë politike, duhet të respektojnë heshtjen zgjedhore, sidomos në aktivitetin e tyre në terren.
Në zgjedhjet e pjesshme të 6 marsit do të marrin pjesë 18 kandidatë.
Edhe
Zgjedhje në pesë bashki, Rama bën thirrje për dalje në zgjedhje
Të gjitha partitë do të garojnë veçmas përveç LSI-së dhe PD-së që janë bashkuar me kandidatët e mbështetur nga Sali Berisha në koalicionin “Shtëpia e Lirë”.
Kandidatët fitues do të mbajnë detyrën vetëm rreth një vit pasi në qershor të vitit 2023 do të mbahen zgjedhjet e rregullta lokale.
Në zgjedhjet e fundit për pushtetin lokal, 30 qershor 2019, opozita nuk mori pjesë. Për rrjedhojë PS-ja fitoi të 61 bashkitë. Shkak që gjashtë bashkitë në zgjedhje janë sot pa kryetar është bërë kandidimi i personave të dënuar dhe dorëheqjet, siç ishte rasti i Durrësit.
Bashkia Shkodër është prej vitit 2019 pa kryetar të ri, pasi fituesi i zgjedhjeve, Valdrin Pjetri i Partisë Socialiste, e humbi mandatin për shkak të ligjit të dekriminalizimit, pasi kishte të fshehur një dënim në të shkuarën. Detyrën e ushtron kryetarja e vjetër e bashkisë, Voltana Ademi.
Edhe bashkia e Vorës mbeti pa kryetar pasi Agim Kajmaku u bë subjekt i ligjit të dekriminalizimit. Në bashkinë Rrogozhinë ndërroi jetë kryebashkiaku Haxhi Memolla, ndërsa kryetari i Bashkisë Dibër, Dionis Imeraj, dha dorëheqjen pasi garoi për deputet në listën e PS-së.
Edhe
Zgjedhjet lokale: Shqipëria ngjyrë rozë
Bashkia e Durrësit mbeti gjithashtu pa kryetar pas dorëheqjes në dhjetor 2019 të Valbona Sakos. Bashkia e fundit që mbeti pa kryetar është ajo e Lushnjës në korrik 2021, kur kryetari Fatos Tushe u shkarkua nga kryeministri pasi u arrestua për korrupsion nga SPAK-u.
Presidenti Meta e argumentoi vonesën e tij të shpalljes së zgjedhjeve të pjesshme me pritjen e një vendimi të Gjykatës Kushtetuese për kushtetutshmërinë e zgjedhjeve të 30 qershorit 2019, të cilat u mbajtën në situatë konfliktuale politike, pasi opozita vendosi t’i bojkotojë ato, ndërsa vetë presidenti i kishte anuluar me dekret. /KSP
