Një mal premtimesh ua dhanë sindikatave vendore përfaqësuesit e koalicionit PAN gjatë fushatës për zgjedhjet parlamentare të 11 qershorit.
Realizimi i pikave të memorandumeve të nënshkruara ndërmjet palëve shihet me skepticizëm nga përfaqësues të sindikatave, të cilët nuk janë ftuar ende në takim nga kryeministri Haradinaj, raporton KTV.
Kryetari i Sindikatës së Shëndetësisë, Blerim Syla, thotë se njëra ndër pikat më të rëndësishme të memorandumit ishte rritja e pagave për punëtorët shëndetësorë, që nuk ka ndodhur tash e 3 vjet, si dhe fillimi i pagesës së rrezikshmërisë në punë që, sipas memorandumit, do të bëhej që në 3 muajt e parë të formimit të qeverisë së re.
Syla thotë se kanë pritur që qeveria t’i bëjë 100 ditë dhe të kalojnë proceset zgjedhore për të kërkuar përmbushjen e këtij premtimi.
Ankesa ka edhe Sindikata e Bashkuar e Arsimit, Shkencës dhe Kulturës.
Rrahman Jasharaj thotë se pjesë e marrëveshjes ishte edhe përfshirja në debat e sindikalistëve kur të përgatitet projektligji për buxhetin.
Por as kjo nuk ka ndodhur.
Edhe
Të gjitha memorandumet e PAN-it me sindikatat
Sipas përfaqësuesve të të dyja sindikatave, proklamimi se mund të ketë 4% rritje të pagave, sipas rritjes ekonomike në vend, nuk do të jetë i pranueshëm për ta, pasi premtimet e bëra e kanë tejkaluar këtë shifër dhe premtimet duhen mbajtur.
Por sa kanë fuqi juridike memorandumet e tilla të nënshkruara në kohë fushate?
KTV-ja ka dërguar pyetje edhe në zyrën e kryeministrit të vendit se a do të realizohen të gjitha pikat e memorandumeve të nënshkruara me sindikatat, por nuk ka marrë përgjigje.
