-
Nga:
Agim Ademi
- 13 janar 2021 17:41
- Shpërndaje në:
Banorët e fshatit Grackë e Vjetër dhe Jeta e Re në Lipjan, prej katër ditësh kanë mbetur pa ujë të pijshëm, derisa vërshimet kanë dëmtuar gypin e ujësjellësit.
Banorët po kërkojnë nga komuna dhe kompania Rajonale e Ujësjellësit “Prishtina” ta riparojnë me urgjencë defektin e shkaktuar.
Ndërkaq, zyrtarët e KRU “Prishtina” në Lipjan kanë thënë se kompanitë të cilat kanë rregulluar shtratin e lumit Sitnica nuk e kanë mbuluar gypin e ujësjellësit.
Ilmi Bublica, drejtor i kësaj kompanie, ka thënë për KOHËN se ky defekt i cili është shkaktuar katër ditë më parë nuk mund të rregullohet derisa të bije niveli i ujit në lumin Sitnica.
“Sot bëhen katër ditë që fshati Grackë e Vjetër dhe Jeta e Re kanë mbetur pa ujë. Gypi kryesor që furnizon këto dy lokalitete, i cili kalon përgjatë lumit Sitnica është dëmtuar shkaku i vërshimeve apo rritjes së nivelit të ujit në lumin Sitnica sepse kompanitë gjatë ndërtimit të shtratit të lumit nuk e kanë trajtuar gypin e ujësjellësit. Pra gjatë punimeve gypin nuk e kanë mbuluar me zhavorr asnjëherë dhe tash nuk kemi mundësi ta rregullojmë derisa të bije niveli i ujit të lumit”, ka thënë Bublica.
Ai ka kërkuar nga qytetarët të cilët i kanë rezervarët e tyre ta thërrasin kompaninë për t’ia mbushur ato me cisterna.
Edhe
Sitnica del nga shtrati
“Nëse qytetarët kanë nevojë për ujë, atëherë kërkojmë prej tyre të telefonojnë sepse ne i kemi në dispozicion kamionët me cisterna për t’i furnizuar ata në çfarëdo mënyre derisa të rregullohet defekti”, ka thënë Bublica.
Ali Stublla, banor në lokalitetin “Jeta e Re” ka thënë se prej 4 ditësh rreth 200 familje kanë mbetur pa ujë të pijshëm, ndërkaq organet kompetente nuk po angazhohen rreth kësaj çështje, sipas tij.
“Punimet jocilësore në shtratin e lumit janë shkaktari kryesor që tash kemi mbetur pa ujë. Gjatë punimeve është dashur që gypi kryesor i ujësjellësit ta ketë një mbrojtje të veçantë, e jo të mbetet i hapur. Sidoqoftë ne si banorë jemi të shqetësuar dhe kërkojmë të riparohet sa më shpejt sepse jemi taksapagues të faturave të ujit. Ndërkaq komuna duhet ta ndëshkoi kompaninë e cila ka kryer punime jocilësore”, ka thënë Stublla.
