Mbi 6 mijë komente janë bërë në një postim në rrjetin social Facebook të kryeministrit Edi Rama, përmes së cilit ai u kërkonte qytetarëve të parashtronin gjërat që do të donin të ndryshonin në vend gjatë mandatit të dytë të qeverisës.
Duke vlerësuar angazhimin e tyre si mjaft të rëndësishëm, Rama bëri të ditur se janë shqyrtuar dhe janë analizuar të dhënat kryesore të këtyre komenteve nga një grup i posaçëm pune.
“Sapo kemi përfunduar një diskutim paraprak mbi të dhënat kryesore që skuadra e shënimeve, ka marrë prej tyre. Janë të dhëna shumë të vlefshme, për të nxjerrë përmes instrumenteve analitikë e statistikorë, jo thjesht opinionet e sugjerimet mbizotëruese, po edhe ndjesitë e brendshme, emocionet tuaja pozitive e negative. Të cilat janë shumë të nevojshme për t’i dhënë qeverisjes së re, pulsin e njerëzve të zakonshëm. Edhe njëherë faleminderit”, shkruan Rama në Facebook, përcjell atsh.
Ndërkohë, kryeministri thotë se paralelisht është punuar për piketat e reflektimit të thellë që do të nisim nga e hëna, mbi mandatin 2013 – 2017 dhe mësimet e tij, në tre plane: në planin e jetës parlamentare, të funksionimit të qeverisjes e të organizimit dhe aktivitetit të partisë.
“Gjithashtu, duke e parë me entuziazëm volumin e reagimit tuaj surprizues për postimin e djeshëm, porosita fillimin e punës për ndërtimin e një strukture digjitale të bashkëqeverisjes me ju”, shprehet Rama.
Ideja shumë fillestare për këtë, sipas Kryeministrit, është krijimi i një platforme të hapur komunikimi e ndërveprimi, “Shqipëria që duam”. E cila, vijon Kryeministri Rama, do të shërbejë për t’ju dëgjuar në kohë reale për çështje të aktualitetit politik e qeverisës, për të diskutuar reforma e masa të rëndësishme dhe mundësuar ndikimin e qytetarëve mbi politikat qeverisëse në çdo sektor e mbi punën e çdo ministrie apo institucioni të varësisë.
Edhe
Rreth 23 mijë ankesa në “Shqipëria që duam”
Po ashtu sipas Kryeministrit, kjo platformë do të shërbejë për të luftuar së bashku korrupsionin, evidentuar tepsixhinjtë apo parazitët e çdo niveli, duke i goditur me zero tolerancë e nxitur zgjidhjen e ndershme të problemeve komunitare apo vetjake të kujtdo prej jush.
“Dua që qeveria e re të jetë një koalicion real me njerëzit e zakonshëm dhe së bashku të rrëzojmë sa të mundim, muret qorre e shurdhe të godinave të shtetit, ndaj jush. Nga bulevardi i Tiranës deri në çdo pikë të vendit, ata që paguhen prej jush për të bërë punën e shtetit për ju, ose duhet të punojnë siç e do puna, ose pastaj duhet të kenë punë me ne”, siguron kryeministri.
E di mirë besomëni, shprehet kryeministri Rama, se sa i madh është ky det i tërë nga e thëna në të bërë, por e di po ashtu se nëse nuk më lini vetëm, s’ka det që nuk e kapërcejmë dot së bashku.
