Shkatërrohet numër i madh i armëve të vogla dhe të lehta

Një numër i madh i armëve të vogla dhe të lehta janë shkatërruar nga Policia e Kosovës.

Kjo ngjarje rajonale e cila u zhvillua në“Metal Holding” në Ferizaj, u organizua nga Ministria e Punëve të Brendshme.

Grumbullimi i këtyre armëve është bërë nga Policia e Kosovës dhe Prokuroria.

Zëvendësministri i Punëve të Brendshme, Behar Selimi tha se ky është një aktivitet në të cilin Kosova përpiqet të jetë pjesë e iniciativave rajonale për më shumë siguri për qytetarët.

“Përgëzoj Policinë e Kosovës dhe Prokurorinë në punën e madhe që e kanë bërë

në muajt e kaluar në drejtim të realizimit të Strategjisë Nacionale për Kontrollimin dhe Grumbullimin e Armëve të Lehta dhe të Vogla”, tha zëvendësministri Selimi.

Koordinatorja e Programit të UNDP, Valbona Bogujevci, ka thënë se UNDP është e gatshme që të vazhdojë ndihmën dhe përkrahjen dhe të punojë ngushtë me palët e interesuara në adresimin e sfidave të ngjashme në të ardhmen. Ajo tha se posaçërisht në këto kohë që po jetojmë, armët e tilla dhe eksplozivët po bëhen gjithnjë e më shumë të zgjedhura për sulme terroriste.

Katerina Lopo, përfaqësuese e Bashkimit Evropian në Kosovë tha se Strategjia e Bashkimit Evropian për Armët e Vogla dhe të Lehta identifikon Ballkanin Perëndimor, si prioritet kryesor dhe për këtë BE është e përkushtuar të përkrahë në mënyrë sistematike partnerët e Ballkanit Perëndimor në luftën kundër trafikimit të armëve.

Zëvendësdrejtori i Përgjithshëm i Policisë së Kosovës, Naim Rexha, tha se Policia e Kosovës vazhdimisht punon në zhvillimin e kapaciteteve të saja për të pasur sa më shumë sukses në konfiskimin e armëve të jashtëligjshme dhe do të jetë e përkushtuar të largojë mjetet e jashtëligjshme të dhunës nga duart e qytetarëve, sepse ky është element thelbësor që po i kontribuon rendit dhe ligjit dhe sigurisë publike në vend.