Naim Rashiti, drejtor ekzekutiv i Grupit për Ballkan, ka thënë se Bashkimi Evropian po qëndron pasiv dhe po ka mungesë instrumentesh për përfundimin e procesit të dialogut në mes të Kosovës dhe Serbisë. Sipas tij, edhe Shtetet e Bashkuara të Amerikës, pas largimit të presidentit Donald Trump, do të mundohen të ruajnë raportet me Evropën dhe do të qëndrojnë prapa e në mbështetje të BE-së për dialogun.
Ai ka thënë se BE-së po i mungon instrumenti i fuqishëm i ndërmjetësimit për shkak të angazhimit edhe në agjenda të tjera të zgjerimit e liberalizimit të vizave.
Rashiti në emisionin “60 minuta” në KTV ka deklaruar se emisari i posaçëm i BE-së për dialogun, Miroslav Lajçak, në vend të deklaratave duhet të vendosë instrumentin e ndërmjetësimit të fuqishëm.
“BE-ja ka deficite të mëdha për lehtësimin e këtij dialogu. Është mirë që ndërmjetësuesi të mos bëjë deklarata të mëdha, por të vendosë instrumente të ndërmjetësimit siç kishte bërë Ahtisaari, apo ndërmjetësues të fuqishëm me mbështetje të fuqishme politike. Të kursehet nga deklaratat e në takime të tilla si sot e ato të Brukselit duhet të flitet hapur për kompromiset që duhet bërë. Ahtisaari kishte mandat të qartësuar, BE-ja nuk ka. S’ka instrumente të përmbylljes, për zgjerime, anëtarësime, perspektivë të Ballkanit në BE – s’ka të qartë se çka do të rrjedhë pas dialogut apo pas përmbylljes së marrëveshjes, cilat do të jenë hapat vijues, si do të përmbyllet kjo në OKB, në dokumente zyrtare të BE-së kur dialogu është kusht për dy shtetet, çka do të burojë... BE-ja po dështon ta qartësojë këtë. Deklaratat janë dytësore”, ka thënë ai.
“Sa i përket SHBA-së, pas Trumpit do të ketë hezitim maksimal amerikan të ndërtojnë diçka apo do të ketë përkushtim maksimal të administratës amerikane të mbeten prapa BE-së, besnikë të raporteve euroatlantike. S’do të ketë emisar special, as këshilltar special por mbështetje me instrumente të tij për dialogun, siç ka rrjedhur nga fillimet e tij.”
Ai e ka quajtur debat të lodhur çështjen e vendosjes së reciprocitetit ndaj Serbisë. Sipas tij, kjo çështje as që nxit debat në arenën ndërkombëtare, por “do të nxiste nëse do të kishim programe për mbështetje për Luginën, e kur të shihet që Serbia po bën pengesë për t’i implementuar ato”.