Instituti Riinvest dhe USAID kanë organizuar tryezë diskutimi me temën: Barometri i prokurimit publik X-Indeks 2020.
Ky diskutim vjen pas publikimit të raportit mbi transparencën në komunat e Kosovës.
Vlerësim i përbashkët i pjesëmarrësve në këtë tryezë ishte se ka rritje të transparencës nëpër komuna.
“Kem evidentuar që vitet e fundit kemi një rritje të transparencës në prokurimin publik. Ne besojmë që është e pamundur të rritet llogaridhënia nëse s’kemi transparencë. Raporti tenton që në mënyrë objektive t’i krahasojë komunat mes njëra-tjetrës. Pandemia ka treguar se sa e rëndësishme është që të kryhen punët nga distanca”, ka thënë Alban Hashani nga Instituti Riinvest.
Afërdita Mekuli nga USAID, tha se ky është viti i tretë që kjo organizatë mbështet Riinvestin për një raport të tillë.
“Të dhënat tregojnë që kemi përmirësim në tri vitet e kaluara, përveç vitin e kaluar, për shkak të situatës pandemike. Komunat tani janë më efektive në zbatimin e prokurimit publik. Tani gjithë procesi i prokurimit bëhet përmes platformës digjitale. Përmes e prokurimit janë kryer punët nga distanca. Kemi punuar gjatë për të ofruar asistencë në shoqërinë civile që të evidentohen parregullsitë. Projekti jonë është për ta ndihmuar Kosovën”, u shpreh Mekuli.
Edhe
Nëntë komuna arrijnë pikët maksimale për transparencë, pesë të tjera bien ndjeshëm
Sami Uka, anëtar i Bordit të KRPP-së, foli për prokurimin, që sot është elektronik.
“Çështja ka qenë si me rritë transparencën në mënyrë elektronike. Në bashkëpunim me USAID kemi arritur brenda 5 viteve që të kalojmë nga një prokurim në letër në atë elektronik. Sot platforma është 100% efektive. Edhe për shoqërinë civile, për media për qytetarët është një mjet i pazëvendësueshëm”, tha ai.
