Qeveria Haradinaj do që të zvogëlojë numrin e familjeve me asistencë sociale

Qeverisja e Haradinajt, e cila pritet të marrë nesër votëbesimin e Kuvendit të Kosovës, pas koalicionit mes PAN-it dhe AKR-së bashkë me minoritetet, thotë se do të angazhohet që të kontribuojë në zvogëlimin e numrit të familjeve me asistencë sociale.

E këtë mëton ta bëjë përmes politikave të punësimit, krijimin e marrëdhënieve kontraktuale me bizneset për rritjen e numrit të të punësuarve, promovimin e rinisë si fuqi punëtore përmes fuqizimit të Fondit të vetëpunësimit.

Kështu së paku thuhet në dokumentin për “Parimet Programore të Qeverisë së Republikës së Kosovës 2017 – 2021”, të cilin e ka siguruar Kohavisioni, e të cilin deputetët e PANA-s e kanë dërguar bashkë me kërkesën për thirrjen e seancës së jashtëzakonshme për të shtunën pasdite, kur pritet që të votohet Qeveria.