Perteshi: Shkaktarë që ndikuan në përhapjen e radikalizmit – ndjenja e përkatësisë e riislamizmi

Qendra Kosovare për Studime të Sigurisë (QKSS) ka publikuar raportin “Indeksi Kosovar i Reziliencës – Ekstremizmi i Dhunshëm në Kosovë: Çfarë mund të mësojmë nga rezilienca në komunitet?”.

Skënder Perteshi, autor i raportit, tregoi shkaktarët që kanë ndikuar në përhapjen e radikalizmit.

“Deri tash ne kemi hartuar hulumtime qe janë ndërlidhur me faktorë e shkaktarë për përhapje të radikalizmit. Por ky raport tenton ta matë nivelin e reziliencës kosovare ndaj dhunës ekstremizmit dhe radikalizmit”, tha ai, raporton KOHA.

Rezilienca - qëndrueshmëria apo aftësia e ripërtëritjes së individit apo komunitetit ndaj të këqijave apo tronditjeve që mund të ketë pasur.

Tha se me ekstremizmin problemet më të mëdha Kosova i ka pasur që nga viti 2012 dhe vazhdon t’i ketë edhe tash por në nivele më të ulëta.

“Tani përveç rehabilitimit dhe integrimit, prioritet duhet të jetë përgatitja e komunitetit për qëndrueshmëri ndaj këtyre dukurive. Nëse kemi një komunitet rezilient ndaj dhunës, ekstremizmit e radikalizmit atëherë mundësia që dhuna të përhapet brenda këtij komuniteti është më e vogël. Ka shumë shkaktarë qe kanë ndikuar në përhapjen e radikalizmit por ka edhe shumë faktorë që mund të ndikojnë në forcimin e qëndrueshmërisë ndaj këtyre formave të dhunës. Shkaktarë që kanë ndikuar në përhapje: ndjenja e përkatësisë, riislamizimi, vakumi identitar, prejardhja familjare dhe lidhjet familjare me personat e radikalizuar. Ndërsa indikatorët që do të mund të forconin rezistencën ndaj këtyre formave të dhunës janë, identiteti apo kohezioni shoqëror, bashkëjetesa fetare si dhe besimi në institucionet e shtetit”, tha ai.