Nesër në një seancë të rregullt mblidhet Kuvendi i Kosovës, në të cilën përveç pikëve të rëndomta, do të jenë edhe dy interpelanca e dy debate parlamentare, transmeton Koha.net.
Seanca është ftuar për orën 10 dhe do të nisë me pikët:
1. Koha për deklarime jashtë rendit të ditës,
2. Koha për pyetje parlamentare.
Në vazhdim janë:
3. Interpelanca e kryeministrit të Kosovës Isa Mustafa, sipas kërkesës së deputetes Donika Kadaj-Bujupi, e mbështetur edhe nga 15 deputetë nënshkrues, për çështjen e shfrytëzimit të thëngjillit dhe minierën e Sibovcit, dhe
4. Interpelanca e ministrit Blerand Stavileci, sipas kërkesës së deputetit Visar Ymeri, i mbështetur edhe nga 15 deputetë nënshkrues, në lidhje me Kontratën e privatizimit të Kompanisë së Distribuimit të Energjisë Elektrike.
Sipas rendit të ditës të paraparë për këtë seancë, deputetët do të zhvillojnë:
5. Debat parlamentar sipas kërkesës së deputetes Teuta Haxhiu, e mbështetur edhe nga 9 deputet tjerë nënshkrues, në lidhje me Mos zbatimi e rekomandimeve të Avokatit të Popullit nga ana e Qeverisë së Republikës së Kosovës,
6. Debat parlamentar sipas kërkesës së deputetëve Bekim Haxhiu dhe Xhevahire Izmaku, të mbështetur edhe nga 8 deputet tjerë nënshkrues, në lidhje me shkeljen e të drejtave të punëtorëve në Kosovë.
Këto interpelanca kanë qenë në rend të ditës edhe në disa seanca të mëparshme të Kuvendit, por ato janë shtyrë me arsyetime të ndryshme.