Në disa qytete të Kosovës, protestohet me kërkesë lirimin e të burgosurve nga “Grupi i Kumanovës”

Janë bërë 4 vjet nga përleshja e armatosur në “Lagjen e Trimave” në Kumanovë, ku humbën jetën 10 pjesëtarë të grupit të armatosur dhe tetë pjesëtarë të policisë.

Të zhgënjyer me institucionet e vendit, familjarë dhe shokë të të burgosurve kanë protestuar para objektit të Komunës së Ferizajt.

Ata thonë se të burgosurit janë duke u mbajtur padrejtësisht dhe kërkuan nga kryeministri Ramush Haradinaj, që t’u bëjë presion autoriteteve maqedonase që sa më shpejt të lirohen nga burgu 34 personat e dënuar, raporton KTV.

Përveç Ferizajt, të enjten ka pasur protestë edhe në Lipjan në shenjë solidarizimi me të burgosurit.

Gjykata Themelore e Shkupit, më 2017 ka shqiptuar 746 vjet burg për Grupin e Kumanovës, 8 të tjerë u dënuan me burgim të përjetshëm, ndërsa katër prej të akuzuarve u liruan si të pafajshëm.